Gibansay ang mga social workers, in-house parents, ug mga personnel sa Crisis Intervention Unit aron mapalig-on ang ilang kapasidad sa pagdumala ug pag-atiman sa mga kababayen-an ug kabataan nga nag-atubang og krisis nga sitwasyon.
Gipahigayon ang duha ka adlaw nga seminar nga nag-ulohang “Capacity Enhancement for Social Workers and Service Providers on Case Management and Psychosocial Support for Women and Children Clients” niadtong Hunyo 3 hangtod 4 sa Bulwagan ng Karunungan, Provincial Capitol, Mankilam, Tagum City.
Mitambong isip mga resource speakers ang mga opisyal gikan sa Department of Social Welfare and Development Field Office XI (DSWD FO XI), lakip sila si Social Welfare Officer I Rose Ann Cordoves, Social Welfare Officer II Jovelyn Trajano, ug Project Development Officer III Angelie Rodriguez-Darilay.
Atol sa seminar, gipasabot sa mga resource speakers ang kamahinungdanon sa pagsunod sa mga protocol ug teknikal nga proseso sa pagdumala sa mga kaso. Gituki usab nila ang mga pamaagi sa paghatag og psychosocial support alang sa mga kababayen-an ug kabataan, social work ug house parenting practices, ingon man social work counseling pinaagi sa mga simulation exercises aron mas mapalawom ang praktikal nga kahibalo sa mga partisipante.
Sumala ni Social Welfare Officer III Fevelyn Marfe sa PSWDO, ang maong pagbansay nagtumong sa pagpalapad sa kahibalo ug kahanas sa mga social workers, ilabina sa husto nga pag-atiman ug pagprotekta sa mga biktima sa pagpangabuso.
Matud pa niya, nahimong posible ang maong inisyatiba pinaagi sa pagpanguna ni PSWD Officer Rosalinda Rapista ubos sa Human Resource Development (HRD) Plan sa probinsya alang sa tuig 2026–2027 ubos sa kamandoan ni Governor Edwin I. Jubahib.
Gidasig usab ang mga partisipanti nga magpabiling lig-on, determinado, ug propesyonal sa pagproseso sa mga kaso aron matabangan ang mga biktima nga makabangon gikan sa ilang kasinatian ug makab-ot ang hustisya. Apan ilang gipahinumdoman nga kinahanglan usab nga atimanon ug protektahan sa mga social workers ang ilang kaugalingong kahimsog ug kaluwasan, tungod kay sila maoy nagsilbing lig-on nga suporta ug kasaligan sa mga kliyente nga ilang gitabangan.
