Gilunsad ni Vice Governor Clarice Jubahib ang Caravan of Services alang sa mga kababainhan atol sa culmination program nga gipahigayon sa Kapalong Town Square, Marso 9. Isip Chairperson sa One DavNor Association of Women (ODAW), siya mismo ang nanguna sa kalihokan nga gitambongan sa nagkadaiyang pundok sa kababainhan gikan sa lain-laing barangay sa lungsod.

Sa iyang mensahe, gipasabot ni Jubahib nga padayon niyang gihatagan og prayoridad ang pagpalig-on sa malungtarong panginabuhian alang sa women's sector sa probinsya. Matod niya, gusto niyang mabati sa mga kababainhan nga adunay probinsya nga andam moatiman, ug mosuporta kanila.

Naghatod ang caravan og lain-laing serbisyo sama sa libreng medikal nga konsultasyon ug check-up aron matabangan ang mga nahisgotan sa pag-atiman sa ilang panglawas. Gihatagan usab ang mga partisipante og tag-lima ka kilong bugas ug payong nga magamit sa panahon sa ting-ulan ug ting-init.

Kabahin ang maong kalihokan sa nasudnong selebrasyon sa Women’s Month karong tuiga nga adunay tema nga “Lead Like the Babaylans, Filipinas.” Plano usab sa kapitolyo nga dal-on ang susamang serbisyo ngadto sa ubang mga dapit sa probinsya aron mas daghang mga babae ang makabenipisyo.

Gidasig ni Board Member Mary Jane Ang ang mga sama kaniya nga asawa ug inahan nga hatagan og importansya ang pag-atiman sa ilang panglawas. Samtang gipahinumdoman ni Tagum City Vice Mayor Atty. Eva Lorraine Estabillo nga gipanalipdan sa balaod ang mga kababainhan pinaagi sa Magna Carta of Women ug sa VAWC Law.

Nagpasalamat usab si Maria Theresa Timbol, Vice Chairperson sa ODAW, sa mga organisasyon sa maong sektor nga mitambong sa kalihokan. Gi-awhag niya ang tanang babae nga padayon nga tratohon ang ilang kaugalingon nga may dignidad ug pagkapareho sa katilingban.

Mitambong usab sa maong aktibidad ang ubang mga opisyal ug bisita nga nagpakita og suporta sa maong programa.