Gipangunahan ni Provincial Governor Edwin I. Jubahib ang seremonya sa pagtunol sa mga hayop sama sa kanding, baka, karnero, pabo ug manok ngadto sa mga mag-uuma sa DavNor Coliseum, DNSTC Mankilam, Tagum City niadtong Mayo 5.
Kauban sa gobernador si D.A. Regional Executive Director RFO XI Red Macario Gonzaga, uban sa mga benepisyaryo gikan sa pito ka lokalidad nga grabeng naapektuhan sa shearline ug trough sa Low Pressure Area (LPA) niadtong 2022. Kini maoy inisyatiba nila ni Gov. Jubahib ug Vice Gov. Clarice Jubahib uban sa suporta sa Department of Agriculture aron makabangon gikan sa pagkaigo sa kalamidad ug makaangkon sa malungtarong panginabuhian ubos sa programang Kawsa sa Agrikultura ug Panginabuhian sa Barangay (KAAGAPAY).
“Gihatagan mo og kahigayonan sa gobyerno nga mamuhi og kahayopan. Dili namo mangita’g kapital nga inyong ipalit kondili gobyerno na ang ni-provide. Kung inyo ‘ning maalagaan, mangita pa ta’g laing budget para atoa ‘ning madugangan,” ingon ni Gov Jubahib.
Gipasabot usab ni Executive Regional Director Gonzaga nga ang Department of Agriculture hugtanong mihatag og suporta sa mga mag-uuma.
“Ang inyong mga danyos tagaan gyud na’g pagtubag gikan sa probinsya, provincial government ug sa national government through Department of Agriculture,” sulti ni RD Gonzaga.
Iya usab gisulti nga gikinahanglan sa mga farmers nga ang ilang uma labi na sa mga nadanyos sa kalamidad matala sa Registry System for Basic Sectors in Agriculture (RSBSA) aron mahatagan og tabang pinansyal.
“Hopefully, sunod semana kung ma-release na ‘tong funds naa pud ta’y public assistance. Cash assistance to siya, anytime tanang farmers hatagan nato. Pero sige lang. Dili lang sa nako i-ano. Pero nakaprograma na ‘to tanang farmers nga registered sa atong RSBSA,” dugang niya.
Samtang sa maong kalihokan gisulti ni Provincial Veterinarian Dr. Dennis Sumaoy nga adunay kapin 500 ka mag-uuma ang mahatagan sa mga kahayopan.
“Total of 519 farmers benefeciaries will receive assistance under this program... 410 goats naa ta’y 138 ka mga karnero. Then, we have 26 ka baka. Then, we have 43 carabaos, 1,480 ka manok,” matud ni Dr. Sumaoy.
Gipangunahan sa Provincial Veterinary Office ug Provincial Agriculturist Office (PAGRO) ang kalihokan, lakip ang oryentasyon sa hustong pag-atiman sa mga kahayopan. Nitambong usab sila si Provincial Administrator Atty. Ralph Dela Cruz, KAAGAPAY Lead Arnel Montero, KAAGAPAY Technical Working Group Coordinator Alphabet Gulanes, ug uban pang mga department heads.
Writer: Lorna TripoliPhoto: Andew John Hababag
