DAVAO DEL NORTE - Malampuson nga gipahigayon ang "Libreng Operation Tuli" sa probinsya sa pagpanguna ni Vice Governor Clarice Jubahib ug Vice Governor's Office nga nakahatag og libreng serbisyo medikal sa kabatan-onan sa nagkalain-laing lungsod ug siyudad sa probinsya.

Opisyal nga gisugdan ang maong programa niadtong Abril 17, 2026 pinaagi sa kick-off activity nga gihimo sa Lungsod sa Sawata ug gitapos niadtong Mayo 13 sa Barangay Visayan Village, Tagum City.

Miabot ang programa sa pito (7) ka munisipyo ug tulo (3) ka siyudad sa probinsya, diin hangtod 300 ka indibidwal matag venue ang natagaan og serbisyo sa medical team. Sa maong operasyon, wala maapil ang Munisipyo sa Talaingod tungod aduna nay nag-unang tulo ka adlaw nga medical mission nga gipahigayon sa LGU kauban ang usa ka non-government organization.

Dako usab ang pasalamat sa opisina sa bise gobernador ngadto sa mga Municipal Health Office (MHO), City Health Office (CHO), ug sa Provincial Health Office (PHO), PEEDO-Carmen ug Kapalong Hospital Zone tungod sa ilang walay hunong nga suporta ug pagtinabangay aron masiguro ang hapsay ug malampusong implementasyon sa programa.

Nagpabilin nga pasalig sa liderato ni Vice Governor Jubahib ang pagdala sa mga serbisyong medikal nga mas mapaduol sa katawhan, ilabina sa mga kabatan-onan ug pamilyang nanginahanglan og tabang sa panglawas.