Giawhag ni Governor Edwin “Kuya Gob’ Jubahib ang mga local government units ug mga ahensiya sa gobyerno nga magtigom og gasolina ug krudo aron padayong makahatud sa serbisyo bisan modugay ang tensyon sa Middle East.
“Ang mga LGUs ug ang provincial government dili ta pwede moundang because of the fuel problem,” sulti ni Kuya Gob, atol sa 1st Quarter Meeting sa Provincial Peace and Order Council (PPOC), kagahapong adlawa, Marso 23, 2026.
Gilatid sa gobernador, kauban ang mga ahensiya sa gobyerno, ang mga lakang emerhensiya tungod sa pirming pagmahal sa presyo ug hulga sa pag-undang sa suplay sa lana tungod sa nagpadayong tensyon sa Middle East, nga maoy nag-unang tuburan sa lana dinhi sa nasud.
Gawas sa pagdaginot sa kuryente ug petrolyo, gihatagan sab og gibug-aton ni Kuya Gob ang pagtigom sa igong reserba sa lana aron masiguro ang paghatud sa serbisyo, labi na ang emergency response ug rescue operations panahon sa kalamidad.
“Ang tanang LGUs kinahanglan dunay reserve nga diesel ug gasoline kay just in case mawad-an og supply dapat ang LGUs naa, para kung naay emergencies naay magamit para sa mga equipment ug mga ambulance,” sulti sa gobernador.
Aron masiguro nga dunay suplay ang probinsiya, gibutyag ni Kuya Gob ang iyang inisyatiba pagnegosyar sa gobyerno sa Malaysia, aron maka-supply ang Petronas sa probinsiya.
“Humingi tayo ng tulong regarding sa supply at hindi naman sila nag-refuse. Pwede sila magpadala cash-to-cash basis,” sulti ni Kuya Gob, diin mokabat ngadto sa 44 million ka litro sa petrolyo ang matag-shipment.
Isip pagprotekta sa mga konsumante karong panahon sa krisis, giaprobahan sab sa PPOC ang resolusyon labot sa pag-estalisar pag-usab sa Provincial Price Coordinating Council (PPCC).
Tumong niini ang pagsiguro sa epektibo nga koordinasyon sa mga opisina sa probinsiya, mga ahensiya sa national nga panggamhanan ug sa pribadong sektor pagpanalipud sa kaayuhan sa mga konsumante, ug pagsiguro sa makatarunganon nga presyo ug igong supply sa mga nag-nang palaliton.
"We need to protect the interest of our consuming public,” ingon ni Kuya Gob.
