Gitunol ang mga semilya sama sa batong, talong, ug uban pang gulay ngadto sa mga benepisyaryo sa Balai Kabauyan Tu Dibabawon Housing Project sa Sitio Lunao, Barangay Sto. Niño, New Corella niadtong Abril 23.
Gawas sa mga semilya, nadawat usab nila ang libreng serbisyo alang sa panglawas sa ilang mga kahayopan sama sa mga iro, iring, ug kanding pinaagi sa paghatag og bitamina, bakuna kontra rabis, ug pagpurga.
Giawhag usab ang mga residente nga magtukod ug kaugalingong gulayan sa ilang tugkaran, subay sa tinguha ni Governor Edwin Jubahib nga palig-onon ang pagkaon sa matag panimalay ilabina karong panahon sa krisis.
Ang maong serbisyo gipangunahan sa Provincial Veterinary’s Office ug Provincial Agriculturist’s Office, uban ang suporta sa ubang departamento sa probinsya ubos sa KADASIG Project (Knowledge, Advocacy, and Development Assistance for Indigenous Groups). Ang KADASIG Project moabaga sa veterinary health services ug agricultural support alang sa mga IP housing beneficiaries.
Si Datu Angelito Omos nagkanayon nga dako ang kausaban sa ilang kinabuhi sa mga IPs sa administrasyon ni Gob Jubahib ilabina sa pagpangusog sa gobernador nga matukoran og disenteng panimalay ang mga IPs diha sa kabukiran.
“Kini lamang nga administrasyon nakaangat ang IP sukad sa kasaysayan sa akong pagtrabaho bilang social worker sa 52 ka tuig,” sulti ni Datu Omos.
Dugang sulti niya nga ang pagbakuna sab sa mga iro nakatabang sa ilang dapit sa pagpatunhay sa kalinaw sa ilang tribu.
“Kining gihimo nato karon nga mga serbisyo nga gihatag makatabang kaayo nato kini. Halimbawa, pagpang- injection sa mga iro. Hinumdoman nato sa kasaysayan dinhi, nahimong tribal war tungod sa mga iro,” ingon sa datu.
Samtang, Si Emelio Baguio nga Executive Assistant ug representante sa gobernador nipaabot sa mensahe ni Gob Jubahib pinaagi sa pag-awhag sa nga IPs nga itanom ang mga gipanghatag nga mga semilya sa gulay ug ila kining palamboon.
Writer: Lorna TripoliPhotos: Charlie Verdijo
