Hingpit na nga kontrolado sa Davao Light and Power Company, Inc. (Davao Light) ang electricity distribution services sa Tagum City, Kapalong, New Corella, and Talaingod sa mainland Davao del Norte sugod Mayo 26, 2026.

Kini tungod sa gipatuman nga Supplemental Writ of Possession nga gipagawas sa Regional Trial Court Branch 2 sa Tagum City, nga naghatag gahum sa Davao Light aron bug-os nga makontrol ang paghatag kuryente sa upat ka mga lugar sa probinsiya.

Una nang na-take-over sa Davao Light ang power distribution sa Island Garden City of Samal niadtong bulan sa Pebrero 2026.

Sulti ni Davao Light president and chief operations officer Enriczar Tia nga usa kini ka mahinungdanong lakang sa transisyon sa electricity distribution operations sa probinsiya, ubos sa Republic Act (RA) No. 12144.

Ang maong balaod nag-expand sa legislative franchise sa DLPC aron molangkob sa Tagum City, Island Garden City of Samal, ug 19 ka mga munisipyo sa mga probinsiya sa Davao del Norte and Davao de Oro.

Giklaro ni Tia nga sugod Mayo 26, 2026, wala nay obligasyon sa Nordeco ang mga konsumante sanglit Davao Light na ang tag-iya sa kuryente nga ginapalit gikan sa mga power suppliers.

“Dapat dili na malibog sa pagbayad sa inyong bill later. Be cautious pud,” maoy iyang pahimangno sa mga konsumante.

Nanawagan sab si Governor Edwin “Kuya Gob” Jubahib sa Nordeco nga respitohon ang mga court orders.

“Kinahanglan mo-obey sila… mo abide sila sa tanang legal court order,” sulti sa gobernador.

Gipasalig siya nga mangita pa siya og dugang supply sa kuryente aron masiguro ang lig-on nga supply sa kuryente sa probinsiya, nga maoy usa sa mga pundasyon sa mas malamboon nga ekonomiya.

“Ang atong paningkamot para sa maayong serbisyo sa electricity dili mahuman sa pag-take-over sa Davao Light karong adlawa. Kundili maningkamot ta’g additional source of electricity, like waste-to-energy, solar farm and mini-hydroelectricity para mas labaw nga ma-attract and mga investors nga mo-invest in Davao del Norte,” panapos ni Kuya Gob.