Misurender kang Governor Edwin “Kuya Gob” Jubahib ang 95 ka Friend Rescued (FRs) nga gilangkuban sa 74 ka FRs gikan sa Talaingod, Davao del Norte ug 21 gikan sa Agusan del Sur.
Atol sa gipahigayon nga Mass Surrender of Former Rebel niadtong Enero 27, sa Balimba Hills Activity Center, Sitio JBL, Brgy. Sto Niño, Talaingod, miatubang ug midawat ang mga FRs sa bag-ong paglaum ug oportunidad nga gidalit sa gobyerno, bitbit ang 29 ka low powered firearms.
Sulti sa team leader sa Dismantled Guerilla Front 55, usa sa mga misurender sa sabakan sa balaod, dako ang iyang kalipay kang Kuya Gob ug sa 60IB sa pagtabang kanila isip usa sa mga biktima sa mali nga pagdumala.
“Dako kayo ko’g pasalamat, hilabi na kang Gobernador Jubahib ug sa 60IB, dako kayo ko ug pasalamat nga mutabang sila sa amoa. Isip usa kami ka biktima sa kabukiran” ingon pa niya.
Matud usab sa usa sa mga surrenderees, ang paglimpyo sa ilang pangalan mao ang isa sa rason maong sila misurrender.
“Gusto ko na… mawala na akoang pangalan…nag huna-huna na gyud ko na mag surrender. Nag pasalamat pud ko sa dati namong commander na si Maki.. siya ang nag clear sa amoa didto sa bukid nya mapasurrender mi..” sulti niya.
Ang pagtanyag og mga benepisyo sa mga FRs mao ang isa sa mga programa ni Kuya Gob aron mas masayud pa ang mga miyebro sa New People’s Army (NPA) nga masaligan ug maduolan ang Probinsyal na Panggamhanan. Nanawagan usab si Kuya Gob sa mga nahibilin pa sa kalihukan nga musurender na sa gobyerno.
“Ang dapat ninyong buhaton… katung nag lie low pa nga uban nga wa’ pa muhingpit ug balik loob…ug ang uban nagpabilin pa didto, tua pa sa laing probinsya, kumbinsihi ninyo . Ingna ninyo nga balik mo kay, hayahay na kayo karung panahona… safety ang kinabuhi, naa pay benepisyo nga dako nga madawat..” sumala sa gobernador.
Gisaysay ni Kuya Gob ang mga benepisyong madawat sa mga FRs lakip na ang P10,000 cash assistance, food supplies, ug paghatag og Sustainable Livelihood Program sa tanan, ubos sa pagdumala sa Provincial Social Welfare and Development Office.
Kauban usab sa seremonya ug pagpresenta sa mga FRs ang Brigade Commander, 1003rd Infantry (Raptor) Brigade BGEN Christopher Diaz, PA, Commander, 10ID, PA MGEN Alvin Luzon PA, Commanding Officer LTC Jovily Carmel DF CABADING INF (GSC) PA. Anaa usab sa maong seremonya si Talaingod Mayor Jonnie Libayao ug DNPPO Provincial Director Glenn Cristines.
Writter: Rovel TabelonPhotographer: Andrew John Hababag
