Gidala sa buhatan ni Vice Governor Clarice Jubahib ang nagkadaiyang serbisyong medikal alang sa mga kababayen-an ngadto sa Persons Deprived of Liberty (PDL) sa Tagum City Jail sa Barangay Canocotan, Tagum City niadtong Marso 19.
Ang maong inisyatiba kabahin sa selebrasyon sa National Women’s Month nga gisaulog sa probinsya ubos sa pagpanguna sa Vice Governor’s Office ug sa One Davnor Association of Women (ODAW), nga hiniusang gidumala sa batan-ong bise gobernador.
Pinaagi sa pakig-alayon sa Provincial Health Office, malampusong napahigayon ang libreng konsultasyon ug paghatag og tambal alang sa mga kababayen-ang PDL. Dako ang pasalamat nga gipadayag sa mga sakop sa female dormitory sa City Jail, tungod kay bisan sa ilang kahimtang, gipabati kanila sa bise gobernador nga sila adunay bili sa katilingban.
Gipasabot usab sa bise gobernador nga ang maong programa naghatag og paglaum sa mga PDL, uban sa mensahe nga adunay maayong kaugmaon nga nagpaabot kanila ilawom sa usa ka gobyernong kasaligan ug mapinanggaon.
