Nihatag og pinansyal nga tabang ang Probinsyal nga Panggamhanan sa Davao del Norte ngadto sa 35 ka biktima sa sunog ug ipo-ipo, ingon man sa siyam ka distressed ug repatriated Overseas Filipino Workers (OFWs). Gipangunahan kini sa Provincial Social Welfare and Development Office ug Provincial Treasurer’s Office.
Ang matag OFW nakadawat og P5,000. Samtang ang matag pamilya nga adunay totally damaged nga panimalay gumikan sa sunog nakadawat og P10,000. Nakadawat usab og P5,000 ang mga indibidwal nga adunay partially damaged houses. Sa kinatibuk-an, mikabat sa P265,000 ang natunol ug dugang kinatibuk-ang P45,000 alang sa siyam ka mga OFWs ubos sa Emergency Shelter Assistance Program.
Sumala sa representante nila Governor Edwin I. Jubahib ug Vice Governor Clarice Jubahib, bisan dili dako ang kantidad, apan kinasingkasing kining gitunol isip tabang sa mga benepisyaryo nga nag-atubang sa lisod nga kahimtang.
Samtang, atol sa hamubong programa nagpadayag og pasalamat ang mga nidawat sa tabang pinansyal. Nisaysay usab ang mga OFWs sa ilang mga nasinati ug mga hinungdan sa ilang pag-uli.
Ang maong simpleng seremonya gihimo sa VIP Clubhouse, DNSTC, Mankilam, Tagum City, Abril 20.
Writer: Lorna TripoliPhoto: Mike Balila
