Aron masiguro ang padayun nga paglambo sa turismo sa Island Garden City of Samal, gipangunahan ni Governor Edwin "Kuya Gob" Jubahib ang pag turnover sa mga Tourism Infrastructure Project ug ang Memorandum of Agreement (MOA) signing alang niini nga mga katuyoan.

Matud sa gobernador, usa ka garbo sa Davao del Norte ang Samal tungod sa katahum niini ug sa kadaghan sa mga turista nga nagaadto sa isla.

"Samal is truly one of the pride of our province. Daghan kaayo ang nagaadto diri tungod sa katahum sa inyong isla. Mao nga importante nga padayon nato nga palambuon ang atong tourism infrastructure aron mas daghan pa ang oportunidad nga mahatag sa katawhan sa Samal," sulti ni Kuya Gob

Lakip sa mga gi-turnover nga proyekto mao ang sa Sanipaan Marine Park, Samal Island Nature Park sa Bandera, Aundanao Dive Site, ug Kaputian Beach Park, nga gilauman nga makatabang sa pagpalig-on sa turismo sa isla.

Samtang, gipasalamatan usab ni Samal Isanld City Mayor Lemuel "Toto" Reyes ang Provincial Government of Davao del Norte sa ilang suporta sa mga proyekto nga magpalambo sa turismo sa siyudad.

"Ang atong MOA signing karong adlawa usa ka importante nga lakang aron mapalig-on pa ang partnership sa atong siyudad ug sa probinsya. Pinaagi sa atong pagtinabangay, mas mapalambo nato ang turismo sa Samal ug mas mapalig-on nato ang atong pangandoy nga mahimong premier island destination ang atong isla," ingun ni Reyes

Ang maong proyekto kabahin sa pagpalig-on sa tourism branding sa isla nga “Dive into Beauty,” samtang padayon nga ginapalambo sa probinsya ang sustainable ecotourism sa lugar.