Aron malikayan ang dakong kadaot panahon sa linog, gipahigayon sa Probinsyal nga Panggamhanan sa Davao del Norte pinaagi sa Provincial Disaster Risk Reduction and Management Council (PDRRMC) ang “Walk the Fault” activity sa Barangay Santa Fe, New Corella gahapon adlawa Mayo 18, 2026.
Tumong sa maong kalihokan nga mahibal-an ug mamarkahan ang eksaktong agi sa fault line aron maandam ang mga residente ug malikayan ang peligro panahon sa kusog nga linog, ilabina sa mga balay nga direktang nakapatong sa fault line.
Kahibaloan nga ang paglihok sa active fault mahimong moresulta sa pagkaliki sa kalsada, pagkatagak sa mga poste, ug posibleng pagkaputol sa suplay sa tubig ug kuryente.
Dugang pa, ang mga lugar nga duol sa fault line mahimong maapektuhan sa “liquefaction,” diin ang yuta molutaw o mahimong humok tungod sa kusog nga pag-uyog, hinungdan sa pagkalubog sa mga panimalay nga dili lig-on ang pundasyon.
Matud ni Santa Fe Barangay Captain Verulo Guzon, dako kaayong tabang ang maong aktibidad alang sa ilang kasayuran ug pagpangandam.
“Pinakamaayo gyud ni nga inisyatibo para sa among kaayohan aron makahibalo mi unsaon pag-andam ug unsay angayang buhaton kung adunay linog, labi na nga naapil diay among barangay sa maagian sa fault line,” ingon ni Kapitan Guzon.
Gipatin-aw usab ni Philippine Institute of Volcanology and Seismology (PHIVOLCS) Supervising Science Research Specialist Jeffrey Perez nga adunay dili molapas sa napulo ka balay ang direktang maagian sa active fault line sa Barangay Santa Fe.
Dugang niya, ang maong fault line kabahin sa usa sa pinakataas nga fault line sa Pilipinas, ug naapil ang Brgy. Santa Fe sa mga lugar nga maagian niini. Tulo ka mga lugar sa New Corella ang apektado, apan usa lamang ang gibisita tungod kay kini lang ang adunay mga residente.
Samtang, giingon ni Provincial Planning and Development Officer Hazel Zafra nga dugay nang plano sa Provincial Government ang maong inisyatibo isip kabahin sa prevention and mitigation program sa probinsya, ug malipayon sila nga natuman na gayud kini.
“Importante kaayo nga mahibal-an kung asa ang agi sa fault line aron maapil kini sa land use plan ug malikayan ang pagpahimutang og mga establisyemento sa peligro nga lugar,” matud ni Zafra.
Nagpasalamat usab si New Corella Municipal Disaster Risk Reduction and Management Officer Joe Mar Chatto sa suporta sa probinsya ug sa nasyonal nga ahensya alang sa maong kalihokan.
“Lipay kaayo mi kay dako ni nga tabang sa prevention and mitigation efforts sa among lungsod, ug ma-integrate nato kini sa contingency plan ug land use plan sa New Corella,” matud ni Chatto.
Ipasa usab ang resulta sa survey ngadto sa munisipyo aron mapahimangnoan ang mga indibidwal nga nagplano pa lamang magtukod og balay ibabaw sa fault line.
Kabahin sa kalihokan ang paghatag og oryentasyon sa mga residente bahin sa hustong pagpangandam ug pagpalig-on sa ilang mga balay ug istruktura aron mas makasugakod kini sa kusog nga linog.
