Gipangunahan ni One DavNor Association of Women (ODAW) Chairperson ug Vice Governor Clarice Jubahib ang kulminasyon sa usa ka bulan nga pagsaulog sa probinsya sa National Women’s Month karong adlawa, Marso 27, sa DavNor Gym, DNSTC, Tagum City.

Inubanan sa mga kababayen-ang lideres ug opisyales sa probinsya, nagsadya sa kalipay ang mga nagkalainlaing asosasyon ug Council of Women gikan sa matag LGUs samtang nakadawat sila og mga gasa ug pahalipay.

Sa iyang mensahe, gibutyag sa bise gobernador nga ubay-ubay na ang nakabenepisyo sa ilang pagsuroy ug paghatod og libreng Caravan of Services alang sa mga kababayen-an sa tanang LGUs sa probinsya isip kabahin sa ilang pagsaulog sa National Women’s Month.

Aduna’y 444 ka mga kababayen-an ang nakapahimulos sa eye care services; 137 sa pap smear ug cervical cancer screening; 82 sa mga serbisyong panlawas ug 35 sa mga tambag legal; 276 ang mi-avail sa libreng manicure ug pedicure services; ug 186 sa libreng pagpagupit sa buhok.

Sa kinatibuk-an, nakahatod og libre ug klase-klaseng serbisyo ang programa ni Vice Governor Clarice sa 1,339 ka mga benepisyaryo sa tibuok probinsiya sulod sa usa lamang ka bulan. Kini iyang gituyo aron mabati sa tanang kababayen-an ang ilang importansya, bisan pa man sa kalagyo sa ilang mga lugar.

Nagsilbi usab isip guest speaker sa maong selebrasyon si Davao de Oro Vice Governor Dorothy Gonzaga, kung asa iyang gibatbat nga aduna pay taas nga agian aron mahimong tinuod nga patas og inklusibo ang katilingban. Gidasig usab niya ang mga kababayen-an sa padayon nga pagbarog tungod dako sila og parte sa progreso sa komunidad.

Midungag usab sa kaalam sa mga mitambong sa maong kasaulogan ang lecture ni Dr. Emilie Debil Ugdang gikan sa Davao Regional Medical Center mahitungod sa Cervical Cancer Awareness. Gibida usab sa lainlaing sektor sa kababayen-an ang ilang mga produkto ug display.