Isip pag-ila sa dakong papel sa Muslim community sa probinsya, nakigduyog sa Provincial Kanduri Eid Al-Fitr Celebration si Governor Edwin “Kuya Gob” Jubahib ug si Vice Governor Clarice Jubahib, inubanan sa mga opisyales, sectoral representatives, ug stakeholders niini kaniadtong Marso 23, 2026.
Ang kanduri usa ka tradisyonal nga panagtapok kon thanksgiving nga selebrasyon sa mga Muslim communities nga sagad ginapahigayon sa mga mahinungdanong okasyon sama sa Eid Al-Fitr o ang katapusan sa Ramadan.
Sulti ni Kuya Gob, gihatagan og importansya sa iyang administrasyon ang pagsuporta sa mga susamang selebrasyon ug mga proyekto tungod parte kini sa ilang pagpaningkamot nga mulambo ang tanang sektor sa probinsiya.
“Atong gipaningkamotan diri sa atong probinsya nga ang tanang sektor magkahiusa ug mulambo nga walay mapasagdan… Kini nagpamatuod nga ang atong liderato walay gipili. Indeed, ensuring the welfare of our people transcends religious boundaries. It is a shared responsibility that unites us all – Christians, Muslims, and members of all sectors,” sulti sa gobernador.
Bisan pa man sa nagkalainlaing relihiyosong tinuohan sa probinsya, nagatuo ang Muslim community nga kahiusahan ang tumong sa maong selebrasyon. Nagpasalamat usab sila sa gobernador tungod sa pagmugna niini og mga inklusibong plano alang sa ilang kalamboan.
“The true essence of the Kanduri is unity. It is a social feast where we realize that our diversity is actually our greatest strength. On behalf of the Muslim Filipinos in Davao del Norte, akong ipaabot ang akong pagpasalamat sa atong governor sa iyahang inclusive governance. Mapasalamaton kami nga ang lider sa probinsiya sa Davao del Norte, nakasabot sa importansya sa paglakip sa Muslim community sa plano sa kalambuan,” sulti ni Arch. Sherrila Porza-Sawah, NCMF Regional Office XI Director.
Anaa usab sa maong panagtapok si SM Anand Subramaniam,ang Managing Director sa Undang Holdings sa Malaysia ug liaison officer sa usa sa mga lideres sa maong nasud nga si His Highness Datu’ Undang Johol. Gibutyag sa gobernador nga buot magpatukod og Halal Food Establishment sa probinsya ang State of Negeri Sembilan, Malaysia aron makatabang sa ekonomiya. Kini mao ang nahisgutan sa pagbisita sa gobernador sa maong nasud sa miaging bulan.
Gipirmahan usab sa mga opisyales, lideres, ug mga stakeholders sa Muslim Communities ang pledge of commitment isip pamatuod sa padayong suporta niini sa mga programa nga gimugna sa Probinsyal nga Panggamhanan sa Davao del Norte alang sa padayong progreso sa mga kaigsuonang Muslim.
