Gi-awhag ni Davao Light and Power Company (DLPC) President Enriczar Tia ang management sa Northern Davao Electric Cooperative (NORDECO) sa pakigbulig ug pakig-uliay alang sa episyenteng paghatod og serbisyo ug lig-on nga suplay sa kuryente sa katawhan.

Kini gipanawagan ni Tia sa press conference human gipaskil sa Sheriff sa Regional Trial Court - Tagum Branch 2 ang mga tarp sa Writ of Possession sa tulo ka NORDECO substation sa Tagum City ug isa sa Asuncion, inapilan sa opisina niini. Subay kini sa ruling sa maong korte niadtong Pebrero 27 ning kasamtangang tuig, nga mitugot sa DLPC nga kuhaon ang pagpanag-iya sa mga kabtangan sa NORDECO.

Sulti ni Tia, parehas lamang ang ilang tumong sa NORDECO, maong mas labing maayo kung makig-kooperar na lang sila aron masugdan na ang transition process niini.

“It’s time that we reconcile. It’s time that we sit down and cooperate to start the transition process. At the end of the day, kami naa diri para sa serbisyo sa katawhan, LGUs, businesses, and sa community. Si NORDECO, same man ang iyang tumong nga para pud sa serbisyo sa members and consumers. Parehas [mi] og tumong actually. So why not, mu-cooperate ta para smooth ang atong transition and makaserbisyo na dayon mi as soon as possible,” sulti ni Tia.

Kahinumduman nga bisan pa man napagawas na ang writ of possession mahitungod sa mga kabtangan sa NORDECO, padayon gihapon ang pag-apela niini sa Korte Suprema ug sa mga Regional Trial Court. Apan, gipaluyohan sa kinhing mga hukmanan ang RA 12144, ug gibasura ang tanang petisyon sa NORDECO.

Gipaabot usab ni Governor Edwin “Kuya Gob” Jubahib ang iyang pagpasalamat sa management team sa NORDECO tungod nahimong hapsay ang pagpaskil sa Writ of Possession sa mga substations karong adlawa. Miuban mismo ang gobernador sa nahitabong pag takeover sa mga assets niini.

“Dako pud ang akong pasalamat sa part sa NORDECO management tungod kay nakita nato na mihatag sila og maayong pag-uban sa pag-take nato sa possession karon. Walay resistance nga nahitabo. Hapsay ang pag-implement… Wala tay report nga nadawat na naay mga bayolente nga nahitabo o mga pagpugong. So dako ang atong pagpasalamat sa ilang partisipasyon,” pahayag sa gobernador.

Mipasalig usab ang gobernador nga iyang tabangan ang mga empleyado sa NORDECO nga makakuha og slot sa pagpangempleyo sa DLPC isip parte sa transition process niini.