Gipadayag ni Provincial Administrator Atty. Ralph Dela Cruz, nga tinguha ni Governor Edwin I. Jubahib nga maapil isip benepisyaryo sa pagatukoron nga DavNor Capitol Employees Ville 1 ang tanang empleyado sa probinsya regular, casual, ug job order nga wala’y kaugalingong panimalay, sa dili pa matapos ang termino sa gobernador.
Matud pa sa provincial administrator napamatud-an na ni Gobernador Jubahib ang iyang commitment sa mga proyektong pabalay pinaagi sa mga inisyatibo sama sa Balai Lupowanan, Balai Pig Imimman sa Talaingod, Balai Kabauyan Tu Dibabawon sa New Corella, ug ang San Miguel Urban Poor Relocation Project sa Tagum City.
Gihisgutan ang maong proyekto atol sa joint meeting sa Provincial Housing Board ug Provincial International Agency Committee nga gipahigayon niadtong Abril 28 sa VIP Clubhouse sa DNSTC Mankilam, Tagum City, diin nagtuki sa "adaption of code of the policy" ug Beneficiary Selection, Arbitration and Awards Committee (BSAAC) guidelines alang sa DavNor Employees Ville 1. Sa maong tigom, gipasabot ni Atty. Dela Cruz ang dakong tinguha sa gobernador nga palapdan ang kahigayonan sa mga empleyado nga makabaton og kaugalingong panimalay pinaagi sa socialized housing program nga ipaagi sa Pag-IBIG Fund.
“Kung pwede tanang empleyado mahatagan, that is the objective. Ingon siya bisan og J.O., kung pwede nato mahatagan og opportunity nga makapanag-iya og disente nga balay,” sulti ni Atty. Dela Cruz.
Kahibaloan nga ang proyekto usa ka condo-type housing nga itukod sa kapin 50 ka ektarya nga luna sa Barangay San Isidro, Tagum City. Gilauman nga makabenepisyo niini ang labaw sa 800 ka empleyado nga nagpahayag na sa ilang interes nga makapanag-iya og balay.
Sa maong miting, gipunting usab ang mga polisiya ug regulasyon nga may kalabutan sa proyekto uban ang Provincial Legal Office. Samtang, gipatin-aw ni Mylin Odron sa Pag-ibig Fund nga prayoridad sa ilang ahensya ang mga aplikante nga adunay kapasidad sa pagbayad sulod sa 30 ka tuig ubos sa Pambansang Pabahay para sa Pilipino Program o 4PH. Bisan pa man, iyang giingon nga ang mga regular nga empleyado nga adunay binuwan nga sweldo nga molapas sa ₱34,000 dili na kwalipikado sa maong loan program nga gi-subsidize sa gobyerno.
“Kung ang iyang sweldo niabot na’g P34,700, dili na siya mo-qualify for 4PH. Pero mo-qualify siya kang Pag-ibig... So, most probably ang inyong mga regular nagsweldo na na og P40,000. So, it’s up to you to decide kung 4PH ba gyud ning tanang benefeciaries,” matud ni Odron.
Gipahimangno usab nga dili mahimong benepisyaryo ang bisan kinsa nga adunay kaugalingong yuta o kasamtangang housing loan sa Pag-IBIG Fund bisan asa sa nasud.
Padayon karon ang proseso sa mga kwalipikadong benepisyaryo pinaagi sa Provincial Administrator’s Office, BSAAC, ug uban pang may kalabutang ahensya.
Gisaksihan usab ang tigom pinaagi sa online audio-visual presentation sa representante gikan sa Department of Human Settlements and Urban Development (DHSUD) ug National Housing Authority (NHA).
Writer: Lorna Tripoli
