Mas gipasayon alang sa mga residente sa Panabo ang pag-akses sa mga serbisyo sa gobyerno sa pagdala sa Probinsyal nga Panggamhanan niini sa unang hugna sa Oplan KKK (Kaagapay sa Kalinaw ug Kalamboan) alang sa tuig 2026 karong adlawa, Mayo 20.

Gidugok sa kapin gatosan ka mga residente gikan sa Brgy. Dalisay, Manay, Dapco, New Malitbog, Nanyo, ug Southern Davao ang mga libreng panlawas ug pangkatilingbanong serbisyo nga dalit sa Probinsiyal nga Panggamhanan, sama sa medical and dental services, HIV screening, PhilHealth Registration, libreng gupit, tambag legal, pagpa-notaryo, ug uban pa.

Gawas niini, nakadawat usab ang mga residente og libreng vegetable seeds, fruit trees, abono, ug grab kits panahon sa emerhensiya. Gihatagan usab sila og oportunidad nga madugangan ang kaalam sa pamuhunan pinaagi sa livelihood training ug business consultation.

Giawhag ni Vice Governor Clarice Jubahib ang katawhan nga pahimuslan ang tanang serbisyo nga dala sa panggamhanan tungod dako kini og tabang gawas sa kamahal sa presyo sa mga palaliton karon.

Gibutyag usab sa bise gobernador nga naka-solicit ang iyang opisina og P6 milyones nga pondo gikan ila Senator Bato dela Rosa, Bong Go, JV Ejercito, ug Bam Aquino. Kini iyang gigahin sa paghatag og libreng medical assistance sa mga katawhang nanginahanglan.

Samtang, prayoridad gihapon ni Governor Edwin “Kuya Gob” Jubahib ang padayon nga pag-alagad sa katawhan, rason nga iyang gipadayon ang paghatod sa Oplan KKK sa matag barangay sa probinsiya. Sumala niya, mas dali na karonang paghatod og serbisyo tungod sa pagtinabangay sa ehekutibo ug lehislatibo sa paggahin og pag-aproba og badyet alang niini.

Gi-awhag usab sa gobernador ang katawhan nga magtinabangay aron mamintinar ang kahapsay ug kalinaw sa probinsiya.

Nakatakda nga ituyok sa Probinsiyal nga Panggamhanan ang Oplan KKK sa tibuok siyudad sa Panabo sa mga musunoray nga mga adlaw.