Isip hinanaling aksiyon, mipalit si Governor Edwin “Kuya Gob” Jubahib ug Vice Governor Clarice Jubahib og duha ka mga motorized bangka alang sa mga residente ug estudyante sa Sitio Kasilak, Barangay Sagayen, Asuncion, Davao del Norte.

Personal nga kuwarta nila Kuya Gob ug VG Clarice ang gigamit pagpalit sa mga bangka nga mokabat ngadto sa P100,000, aron sa paspas nga solusyon, kay dugay pa moabot kung ipaagi pa sa procurement process sa Kapitolyo.

Kumpleto kini sa mga life jackets aron mas luwas ang mga residente ug estudyante sa pagtabok sa sapa.

“Gihunahuna nato, isip amahan sa probinsiya, nga naa tay quick response nga matubag nato dayon ang immediate nga panginahanglan mao nang naka-purchase dayon ta og bangka gikan sa Samal,” sulti ni Kuya Gob.

Alang sa permanenteng solusyon, gipalihok dayon ni Kuya Gob ang pag-apruba sa P15 million nga budget alang sa hanging bridge, samtang iyang gimando ang pagsugod sunod semana sa kalsada gikan sa Barangay Sta. Filomena padulong sa maong sitio.

Bag-o lang nakabalo si Kuya Gob sa maong problema kay wala kini na-report dayon kaniya sa taga-barangay, sanglit ang mga residente dunay inisyatibo sa paghimo sa bangka nga walay katig.

Pero, ang unang bangka nalunod sa pagbaha hinungdan nga napugos ang mga estudyante sa pagkumbitay sa pisi nga daw zipline aron pagtabok padulong eskwelahan, diin makita kini sa nag-viral nga video sa social media.

Dakong pasalamat ni Asuncion Mayor Atty. Rosario Dayaday sa paspas nga tubag ni Kuya Gob sa pagtabang sa mga residente sa Sitio Kasilak.

“Daghan jud kaayong salamat sa atoang gobernador Kuya Gob Edwin Jubahib kay personal jud siyang nianhi. Unya nagdala pa jud siya ug duha ka bangka. Pirti jud nakong lipaya ana,” ingon sa mayora.

“Lipay kaayo mi nga dili na mi maglisod ug safe kaayo mi sa pagtabok sa sapa padulong sa among eskwelahan,” ingon sa estudyante nga si Angel.