Gipangulohan ni Regional Development Council XI Chairperson ug Davao del Norte Governor Edwin "Kuya Gob" Jubahib ang diskusyon alang sa pagpangita og kasulbaran sa mga nag-unang problema sa rehiyon sa pinakauna nga Expanded RDC XI Executive Meeting sa tuig 2026 sa DepDev-RDC XI Center, Davao City niadtong Marso 31.

Gitambongan sa mga representante sa mga national government agencies ug mga pribado nga sektor ang miting aron mahisgutan ang mga nag-unang kabalak-an nga nakaapekto sa ekonomiya sa rehiyon atol sa nagapadayon nga tensyon sa Middle East.

Lakip sa nahisgutan ang mga epekto niini sa pamuhunan, turismo, seguridad, pagtaas sa pamasahe, ug inflation. Gipunting pag usab sa maong panagtapok ang padayon nga pagtaas sa mga palaliton ug ang kritikal nga estado sa suplay sa fuel ug karbon.

Muabot sa 9 ka resolusyon ang napasa sa komite sa maong panagtapok. Gi-awhag usab sa gobernador ang tanang sektor sa pagtinabangay alang sa pagpangita og solusyon sa krisis nga gikaatubang sa rehiyon.