Usa ka dakong kadaugan sa katawhan sa Island Garden City sa Samal ang pag-take over sa Davao Light and Power Company, Inc. (DLPC) sa mga distribution lines sa Northern Davao Electric Cooperative (NORDECO) karong adlawa.
Kini dungan sa pagpaskil ni Sheriff Jonathan Flores sa mga tarp sa Writ of Possession nga gi-issue sa Regional Trial Court (RTC) Branch 4 sa Panabo City, aron sa paghatag gahum sa DLPC sa pagkuha sa distribution system ug assets sa Nordeco.
Naa ang presensiya nila Mayor Lemuel Reyes, Vice Mayor Richard Guindulman ug mga opisyales sa Samal, ug mga opisyales sa Davao Light.
Dili buot ni Governor Edwin “Kuya Gob” Jubahib nga angkonon ang solo nga pag-ila sa iyang paningkamot ug sakripisyo aron matuman kini, sanglit nahitabo kini tungod sa kolaborasyon sa mga opisyales ug katawhan.
“Wala ko nagkinahanglan og reward sa akong paningkamot… So dili ang sariling interes, kundili ang interes sa katawhan sa probinsiya sa Davao del Norte. Ug dili nako ingnon nga nahitabo ni tungod sa akoa. Kundili akong isulti nga nahitabo ni tungod sa collaboration sa tanan nga naningkamot para nga magkaroon og justice ang dugay nang panawagan sa katawhan nga magkaroon og efficient services, lower rate and stable supply of electricity,” ingon sa gobernador.
Sulti ni Engr. Enriczar Tia, President and chief operating officer sa DLPC, nga sigun sa Republic Act (RA) 12144, gihatagan ang Davao Light og “power of eminent domain” aron mahimong solo nga mosuplay sa kuryente sa tanang kanhi franchise area sa NORDECO.
Aron, malig-on ang pagsalig sa katawhan sa Davao Light, gimugna niini ang emergency services nga abli sa tanang oras ug adlaw.
“Pag-contact ninyo nga naa mo’y problema, i-dispatch namo among emergency crew, ug adtoon jud dayon na anytime of the day,”
Dugang sab niya nga tungod sa gihatag nga full authority sa DLPC, lauman sa taga-Samal nga makadawat na sila sa billing sa Davao Light human ang usa ka bulan gikan karong adlawa.
Samtang nag-atang na ang daghang investors alang niini, gibutyag sab ni Mayor Lemuel Reyes nga mipasalig ang mga resort owners nga paubsan nila ang charge sa ilang mga resorts kung makasulod na ang Davao Light.
