Gisugdan ni Davao del Norte Governor ug Regional Development Council (RDC)-XI Chairperson Edwin I. Jubahib ang pagbisita sa mga probinsiya sa Davao Region aron mapalig-on ang kooperasyon sa mga PLGUs alang sa paspas ug inklusibo nga kalamboan sa rehiyon.

Unang gibisita ni Kuya Gob, kauban si RDC-XI Vice-Chairperson ug Department of Economy, Planning, and Development (DEPDev)-XI Regional Director Priscilla R. Sonido ang probinsiya sa Davao Occidental ilawom sa pagdumala ni Governor Atty. Franklin Bautista.

Gihisgutan sa maong panagpulong ang mga priority projects alang sa Rehiyon Onse, sa tumong nga pag-usag sa ekonomiya, paglambo sa imprastraktura ug pagpakusog sa mga batakang serbisyo aron sa kaayuhan sa mga Dabawenyo.

Sa iyang official Facebook Page, gibutyag ni Kuya Gob nga kini sugod pa lang sa mga serye sa pagbisita sa mga probinsiya sa rehiyon, aron sa tumong nga paghiusa sa kasingkasing ug katuyoan sa mga probinsiya alang sa kaayuhan sa mga Dabawenyo.

“Isip chairman sa Regional Development Council XI, sinugdanan pa lang kini sa atong padayon nga pagpaningkamot nga mahiusa ang tanang probinsya sa rehiyon. Luyo sa nagkadaiyang kolor sa politika, nagpabiling usa ang atong damgo, ang kalinaw ug kalambuan sa atong yutang natawhan,” sulti ni Kuya Gob.

Photos | Davao Occidental