Isip kabahin sa selebrasyon sa Rabies Awareness Month, gihatud sa Provincial Veterinary Office (PVO) ang libreng castration ug anti-rabies vaccination sa Munisipyo sa Barulio E. Dujali gahapong adlawa, Marso 26.

Atol sa maong aktibidad, gipasiugda ni Dr. Benjamin Reyno ang kahinungdanon sa rabies vaccination ug responsableng pag-atiman sa mga alagang hayop.

Mapasalamaton usab si Dujali Mayor Margarita "Inday" Rubinos sa presensya ug suporta sa PVO ug sa probinsyal nga panggamhanan, ubos sa pagpangulo ni Governor Edwin “Kuya Gob” Jubahib, sa paghatag og libreng serbisyo alang sa mga Dujaliño aron mapanalipdan sila batok sa peligro sa rabies.

Si Provincial Health Office (PHO) Nurse Eva June Marie Sison-Padlan mipasabot nga ang rabies usa ka fatal virus nga moatake sa utok sa tao, apan siguradong malikayan kini pinaagi sa pagpabakuna.

Gilatid usab ni Dr. Stepahnie Krestee Sator ang mga public health remedies batok sa rabies aron mapanalipdan ang komunidad.

Padayon ang panawagan sa lokal nga gobyerno sa kooperasyon sa tanan aron makab-ot ang tumong nga mahimong rabies-free ang probinsya sa tuig 2030.