Gipakusog sa Davao Light and Power Company, Inc. (DLPC) ang information drive sa Island Garden City of Samal (IGCS), human ang pag-take over niini sa power distribution sa isla.
Kauban sa DLPC Team si RTC Branch 4 Sheriff Jonathan Flores sa pagsuroy sa mga kabarangayan, aron sa pakigpulong sa mga opisyales ug residente bahin sa pagsugod pag-operate sa Davao Light sa isla.
Gipangunahan sab sa opisyal sa korte, kuyog ang mga local officials ug DLPC crew ang pagpaskil sa mga tarp sa Writ of Possession sa mga estratehikong lokasyon sa mga barangay.
Ang maong court order nga gi-issue sa RTC Branch 4 naghatag gahum sa Davao Light aron mopuli pagdumala sa mga distribution system ug assets sa Northern Davao electric Cooperative, Inc. (NORDECO).
Gipasalig ni Jonel Padillo gikan sa Customer Retail Service Department sa DLPC nga mabati na sa mga Samalenyos ang benepisyo sa mas ubos nga billing sa ilang kuryente sa unang bulan pa lamang.
“Sa unang bulan mabati jud ninyo nga mas baba ang bill sa Davao Light. Kung inyong ikumpara, mas baba me by 25 percent," sulti niya.
Saysay sab niya nga kung mag-apply ang mga residente sa davao light, libre ang service draft gikan sa poste padulong sa entrada sa balay, ang meter base ug metrohan, ang pagpataod sa poste ug ang pagtaod sa transformer.
Una nang gipahayag sa media ni Engr. Enriczar Tia, ang President ug Chief Operating Officer sa DLPC, nga mga duha ka semana gikan karon, naay team sa Davao light nga mag-house-to-house para sa pre-application sa mga residente ngadto sa Davao Light.
Sulti niya nga dili na kinahanglan nga moadto pa ang mga residente sa buhatan sa DLPC aron sa pag-apply tungod kay ang Davao Light na mismo ang moduol kanila.
Gibutyag sab ni Tia nga ang DLPC Service Center sa isla anaa gibutang sa Purok 6, Sitio Kaimito, Brgy. Miranda, IGCS, nga andam moalagad ug motubag sa bisan unsang problema sa katawhan sa Samal labot sa kuryente.
