Gipulong ni Governor Edwin “Kuya Gob” Jubahib ang mga kapitan sa Island Garden City of Samal (IGCS) aron sa saktong oryentasyon alang sa suporta sa mga opisyales ug katawhan sa pagahimuon nga pag-take over sa Davao Light ang Power Company (DLPC) sa power distribution system ug assets sa Northern Davao Electric Cooperative (NORDECO) sa Samal, human nga gipagawas sa Regional Trial Court (RTC) Branch 4 sa Panabo City ang Writ of Possession ngadto sa DLPC.

Nahimo kining posible human nga gibasura sa Korte Suprema ang petisyon sa NORDECO nga nagkuwestiyon sa legalidad sa Republic Act (RA) 12144, nga nagpalapad sa franchise area sa Davao Light, nga karon nisakop na sa tanang kanhi franchise area sa NORDECO.

Kauban ni Kuya Gob sila Mayor Lemuel “Toto” Reyes ug Vice Mayor Richard Guindolman.

Usa kining tinuod nga kadaugan alang sa katawhan sa IGCS ug sa mga Dabaonon. Kini usab usa ka dakong pagpanghimatuod sa walay pu-as nga paningkamot ug sakripisyo ni Kuya Gob aron sa mas barato nga kuryente ug mas maayo nga power services, alang sa mas maayong kalidad sa kinabuhi sa mga Dabaonon ug paspas nga paglambo sa ekonomiya sa dakbayan sa Samal ug sa tibuok probinsiya sa Davao del Norte.

Kahinumduman nga apil sa mga rason sa preventive suspension order ni Kuya Gob niadtong tuig 2024 ang iyang way kahadlok nga kampanya batok sa mahal nga singil ug way ayo nga serbisyo sa NORDECO, gumikan kay ang dili maayo nga suplay sa kuryente nahinong usa ka dakong isyo sa paglambo sa ekonomiya ug public safety sa mga katawhang Dabaonon.