Malipayong gikasal ang upat ka magtiayon sulod sa Davao Provincial Rehabilitation Center (DPRC) atol sa pagsaulog sa Culmination Program sa National Women’s Month nga gipahigayon niadtong adlaw'ng Martes, Marso 31.
Sa lima ka nagminyo, duha ka magtiayon ang parehong PDL samtang ang tulo ka lalaki adunay kapikas nga anaa sa gawas sa pasilidad.
Gipangunahan ang seremonya ni Branch 2 Family Court Judge Jimmy Bustillo Boco nga naghatag og tambag sa mga bag-ong minyo nga lig-onon ang ilang panaghiusa aron malikayan ang bisan unsang pagsulay nga makabungkag sa kaminyoon.
Atol sa seremonya, gihimo ang tradisyunal nga panumpa ug pagsul-ob sa singsing isip simbolo sa ilang saad sa usag usa.
Ingun ni Provincial Warden Juaren Matulac, usa kini ka inisyatibo sa probinsyal nga panggamhanan ubos sa pagpanguna ni Governor Edwin I. Jubahib, Vice Governor Clarice ug uban pang ahensya sa kapitolyo aron hatagan og higayon ang mga PDL nga makasal bisan pa og anaa sila sa prisohan.
“Sa tabang sa atong Probinsyal Capitol, kay Kuya Gob Edwin Jubahib na materialize jud ning mga butanga," sulti ni Matulac
Sumala ni Assistant Provincial Administrator for Administration Gale Guadalupe Mortillero, Kini ang unang higayon nga gipahigayon ang kasalan sulod sa DPRC isip kabahin sa culmination program sa women’s month.
"First time nahitabo nga naay kasalan sa piitan ug malipayon usab ang mga involve dinhi nga ubang offices. Dili ni ordinaryong panghitabo kundi ginahatahan gyud og higayon nga dri jud nila (mga PDLs) ma held mismo ang ilang kasal sa provincial rehabilitation center," ingun ni Moltillero
Ang usa sa mga PDL nga si Alex, 13 ka tuig nang nag-uban sa iyang kapikas nga si Jeremy. Dako ang iyang pasalamat nga nahatagan sila og kahigayunan nga malegal ang ilang panaghiusa alang sa ilang pamilya ug anak.
“Dako akong pasalamat karon nga sa Women's Month culmination kay naapil mi nga nga nakasal mi para sa among pamilya ni, ug para sa among mga anak. Hianot sa akong pag gawas ug mauban nakog balik akong pamilya, mahimo nang hapsay ang tanan," matud ni Alex
Samtang ang magtiayon nga sila Joven ug Lory Jane, nga 11 ka tuig nang nag-uban ug usa ka tuig nang nakakulong, nagpahayag usab sa ilang pagpasalamat sa mga opisyal nga nahimong instrumento aron matuman ang ilang kasal. Ingun nila, magpadayon ang ilang paghigugmaay ug suporta sa usag usa bisan sa ilang kahimtang.
Ang maong kalihokan nagpakita nga bisan sa sulod sa prisohan, adunay higayon alang sa paglaum ug pag-uswag.
