Gisugdan na karong adlawa ang pagpinalisar sa mga gikinahanglang dokumento alang sa rehabilitasyon sa Sawata-Mamangan-Pinamuno FMR with bridge sa munisipyo sa San Isidro, pinaagi sa pagpahigayon og site validation niini.

Inubanan sa Department of Agriculture Project Support Office ug Regional Project Coordination Office, gipangunahan sa Provincial Project Managament and Implementation Unit (PPMIU) ang pagsuta sa mga kadalanan nga maoy mabenepisyohan sa proyekto. Miuban usab ang mga opisyales gikan sa lokal nga panggamhanan sa San Isidro.

Ang maong proyekto adunay katas-on nga 9.30 kilometro, lakip ang duha ka tulay. Gilauman nga makabenepisyo kini sa dul-an 2,500 ka mga mag-uuma sa lugar.

Muabot sa hapit P422 milyones ang banabana nga kantidad sa proyekto nga pinondohan sa World Bank pinaagi sa Philippine Rural Development Project, ug sa Probinsiyal nga Panggamhanan sa Davao del Norte.

Sulti ni Provincial Planning and Development Coordinator Engr. Maria Hazel Zafra, gipaniguro ni Governor Edwin “Kuya Gob” Jubahib nga maimplementar ang maong big-ticket project sa munisipyo. Aduna na’y upat ka subprojects ang PRDP sa San Isidro, diin nakompleto na ang duha niini.

Gipaabot usab ni San Isidro Vice Mayor Dagdag Cafe-Binasbas ang hingpit nga pasalamat sa komunidad sa padayon nga suporta sa probinsyal nga panggamhanan sa kalamboan sa munisipyo. Misaad siya nga musuporta usab sila niini nga proyekto tungod dako kini og tabang sa ilang mga mag-uuma.

Gilauman nga masumite na karong bulan sa Pebrero ang mga gikinahanglang dokumento alang sa pag-implementar sa maong proyekto.