Isip pagtuman sa Health and Wellness Program ni Governor Edwin I. Jubahib, giprayoridad sa probinsya ang pagpahigayon sa Employees’ Mental Health Forum 2026 ganinang buntag, sa DavNor Gymnasium.

Kini aron mas malig-on ug mapalambo ang kalidad sa serbisyo publiko, ilabi na taliwala sa mga hagit sa trabaho ug personal nga kinabuhi sa mga empleyado.

Sa mensahe ni Kuya Gob nga gisaysay ni Private Secretary I Jared Maliza, iyang giingon nga ang susi sa lig-on ug epektibong pagpanerbisyo mao ang himsog nga mga kawani.

"When we care for the mental well-being of our people, we nurture a healthier, work compassionate, and more resilience public service," sulti ni Kuya Gob.

Gisiguro usab ni Provincial Human Resource Officer Edwin Palero nga mapahigayon ang maong forum kada-tuig, aron magiyahan sa kanunay ang mga trabahante sa husto nga panghunahuna.

Atol sa forum, gipasiugda sa unang resource speaker nga si Dr. Keith Bryan Ching ang importansya sa 'healthy brain' pinaagi sa Brain SPECT Scan ug gipatin-aw ang mga epekto sa dili himsog nga lifestyle nga mahimong mosangpot sa stress, anxiety, ug depresyon.

Gihatagan usab ni Ching og gibug-aton ang importansya sa pag-ampo, pagbasa sa Bibliya, ug pag-apil sa sports ug physical activities isip paagi sa pagmintinar sa maayong panglawas ug hunahuna.

Si Dr. Rachele Jan Enojada, gipasabot ang koneksyon sa financial ug mental health pinaagi sa tama nga paggasto ug pagpalig-on sa financial stability aron malikayan ang dugang nga stress.

Gipasabot usab ni Dr. Grace Gonzales-Orbita nga kinahanglan mahimong 'resilient' luyo sa mga krisis nga ginaatubang karon, aron magpabiling lig-on mental well-being sa usa ka tawo.

Busa, gipahinumduman ang tanan nga usa sa mga epektibong paagi sa pag-amping ug pag-atiman sa mental health mao ang paghatag og panahon sa kaugalingon.