Aktibong mipartisipar si Regional Development Council XI Chairperson ug Davao del Norte Governor Edwin “Kuya Gob” Jubahib sa ika-22 nga Board of Directors meeting sa Mindanao Development Authority (MinDA) nga gipahigayon sa AMORAP, Sincaban, Misamis Occidental niadtong Marso 26.
Gipangunahan ni MinDA Chairperson Secretary Leo Tereso Magno, Congressman Rufus Rodriguez gikan sa Cagayan de Oro District 2, mga RDC Chairs sa Mindanao, inubanan ni Private Sector Representative Maria Luisa Montemayor Sian ang diskusyon, diin gipasiugda sa mga stakeholders ang panginahanglan sa mas lig-on nga piskal nga suporta aron mapaspasan ang kalambuan sa imprastruktura, agrikultura, ug industriya sa tibuok Mindanao.
Lakip usab sa gihisgutan ang Mindanao Budget Advocacy, pagpalig-on sa mga pamuhunan ug pagpalambo sa industriya, ug ang kahimtangan sa energy security ug fuel price outlook sa Mindanao.
Atol sa maong panagtigum, gi-impluwensyahan ni Jubahib ang iyang mga kaubanan nga MinDA board members sa pagduso sa diskusyon sa Mindanao Tourism Circuit Project, nga nagtumong sa paghiusa sa nagkalainlaing destinasyon aron mapalambo ang turismo ug ekonomiya sa Mindanao. Gitan-aw usab ang posibilidad sa pagdugang og mga flight schedules sa nagkadaiyang rehiyon sa Mindanao.
Gilauman nga makatampo kini sa dugang oportunidad sa panginabuhian ug pagdani sa mga mamumuhunan.
Gituki usab sa maong panagtapok ang pagpalig-on sa mga “shovel-ready” nga proyekto aron masiguro ang mas paspas nga implementasyon niini, sama sa nahisgutan nga pagpatukod og Halal Hub sa probinsya sa Davao del Norte nga musuporta sa Halal industry sa tibuok Mindanao ug sa nasud.
Gilauman nga tapokon sa MinDA Board ang tanang rekomendasyon gikan sa miting ngadto sa konkretong policy proposals ug budget submission aron mapalig-on ang posisyon sa Mindanao sa national development agenda.
Ang partisipasyon ni Jubahib sa maong miting kabahin lamang sa iyang serye sa mga aktibidad atol sa iyang pagbisita sa Misamis Occidental, nga nagpunting sa pagpalig-on sa regional cooperation ug pagduso sa mga programa alang sa kaayohan sa rehiyon.
