Tungod sa kadaot nga dala sa shearline niadtong bulan sa Pebrero nga miresulta sa pagbaha sa daghang lugar sa Davao del Norte, naghatag og tabang ang Department of Social Welfare Development (DSWD) pinaagi sa Emergency Cash Transfer (ECT) payout.

Gisuportahan kini nga kalihokan sa Probinsyal nga Pamggamhanan ubos sa pagdumala ni Governor Edwin “Kuya Gob” Jubahib uban sa pakigtambayayong sa Provincial Social Welfare and Development office (PSWDO) ug sa nagkadaiyang siyudad ug munisipyo sa lugar.

Gipahigayon sa DavNor Coliseum, Mankilam, Tagum City ang pay-out ug ang mga benepisyaryo niini mao ang mga indibidwal nga naapektohan sa baha sa nagkalain-laing lugar sa probinsya.

Mikabat ngadto sa 1,179 ang nakadawat sa pinansyal nga tabang. Ang 1,088 niini gikan sa Carmen, 67 sa Panabo, ug 24 sa Braulio E. Dujali.

P5,122 ang kantidad nga nadawatan sa matag benepsyaro. Sumala sa DSWD XI, gihimo kini nga lakang isip suporta sa ilang pagbangon subay sa epekto sa kalamidad.

Ingun ni Tatay Godofredo Rigdao nga taga Purok 3, Guadalupe, Carmen, iyang ipalit og bugas ug semilya ang iyang nadawatan nga ayuda aron makasugod sila'g pananom og balik sa ilang uma.

"Ang akong kwarta ron ipalit namo, number one bugas, ug similya para makatanom utro kami, kay grabi ang among nasinatian na kalisod. Nagpasalamat ko kay naay tabang na niabot ang gobyerno sa ako," ingun ni Tatay Rigdao