Gi-ebalwar sa Philippine Drug Enforcement Agency (PDEA) ang napulo ka K9 dogs nga nahimutang sa Narcotics Dog Detection (NDD) Facility sulod sa Capitol Compound, kaganinang buntag, Enero 30.

Tumong niini ang pagsusi kon angayan na bang i-deploy ang maong mga iro sa nagkalain-laing anti-drug operations sa probinsya.

Sumala kang Intelligence Officer II Rotchilyn Viador, moagi og tulo ka matang sa test ang mga K9 dogs kauban ang ilang handlers. Una ang ground test, ikaduha ang vehicle test, ug ikatulo ang room test, diin gitagoan sa mga PDEA personnel og ilegal nga droga ang piling kahon, parte sa sakyanan, o sulod sa kwarto. Lakip sa mga substansiyang gigamit sa test ang cocaine, ecstasy, shabu, ug marijuana.

Tagaan og lima ka minuto ang matag K9 dog ug handler aron pangitaon ang maong mga ilegal nga substansiya. Dinhi masusi ang kahanas ug kapaspas sa mga iro sa pag-ila sa droga pinaagi sa ilang hait nga panimaho.

Matud ni Provincial Social Welfare and Development Officer Rosalinda Rapista, padayon ang paningkamot sa Probinsyal nga Panggamhanan sa Davao del Norte, pinangulohan ni Governor Edwin “Kuya Gob” Jubahib, sa paghatag og igong pondo alang sa mga inisyatiba batok kriminalidad, ilabi na sa pagsugpo sa ilegal nga droga.

Dugang pa ni Investigation Agent (IA) V Mildred Driz-Romero, kini ang unang higayon sa tibuok Pilipinas nga ang usa ka Local Government Unit mismo ang mipalit og K9 dogs. Usa kini ka butang nga gipasigarbo sa probinsya, tungod kay dako kini’g tabang aron mas mapalig-on ang kapasidad sa mga kapulisan sa pagsumpo sa kriminalidad sa tibuok Davao del Norte.