Padayon nga gipalapdan sa Probinsyal nga Panggamhanan sa Davao del Norte ang paghatod sa mga batakang serbisyo ngadto sa mga komunidad pinaagi sa Oplan Kaagapay sa Kalinaw ug Kalamboan (KKK) nga gipahigayon sa Barangay Katipunan ug sa mga kasikbit nga lugar niadtong Mayo 29, 2026.
Ang maong programa usa ka inisyatibo ni Governor Edwin “Kuya Gob” Jubahib ug gisuportahan ni Vice Governor Clarice “Clang-Clang” Jubahib aron mas daghang Dabaonon ang makabenepisyo sa mga libreng serbisyo ug programa sa gobyerno.
Pinaagi sa Oplan KKK, gidala sa nagkadaiyang departamento sa Kapitolyo ug mga partner agencies ang ilang mga serbisyo aron mas dali ug sayon nga maabot sa mga lumulupyo ang ilang mga panginahanglanon sama sa serbisyong panglawas, panginabuhian, agrikultura, libreng tambal, libreng gupit, ug uban pang mga programa aron dili na kinahanglang mobiyahe pa ngadto sa Kapitolyo.
Samtang, ipasiugda ni Vice Governor Clarice Jubahib ang padayon nga paningkamot sa iyang opisina aron makahatag og dugang nga tabang medikal ngadto sa mga Dabaonon.
"Naningkamot akong opisina nga makakuha og medical assistance aron adunay mahatag sa atong mga Dabaonon. Nagpasalamat ko sa atong mga senador nga mitabang aron makakuha ang among opisina og ₱6 milyon nga pondo para niini. Salig lang mo sa atong probinsya ug ayaw kawad-i og paglaum. Basta kami uban sa akong amahan nga si Governor Edwin I. Jubahib, andam kanunay nga motabang sa katawhan," matud pa sa Bise Gobernador.
Mapasalamaton usab si Katipunan Barangay Captain Arthur Misoles sa mga serbisyong gihatod sa probinsya.
"Dako kaayo among pasalamat sa mga serbisyong inyong gidala. Dili lamang serbisyo ang inyong gihatud kondili anaa usab ang inyong presensya, ilabi na ni Vice Governor Clarice Jubahib ug sa atong mga department heads," ingun ni Misoles.
Samtang, gipadayag usab ni Maduao Barangay Captain Manolito Alcober ang iyang pagsalig sa administrasyon ni Kuya Gob ug VG Clarice.
"Nindot kaayo nga makakuyog nato si Governor Jubahib kay nakita gyud nako nga andam siya mosuporta sa matag barangay. Wala gyud ta masayop sa pagpili sa Jubahib-Jubahib nga tandem," matud pa ni Alcober
