Andam motabang ang nasud sa Malaysia sa probinsiya sa Davao del Norte kung magkinahanglan kini og suporta labi na sa supply sa gasolina ug crudo, kon ugaling modugay ang giyera sa Middle East.
Isip usa ka lakang emerhensiya karong panahon sa energy crisis, gibutyag ni Governor Edwin “Kuya Gob” Jubahib nga iyang gitawagan ang mga opisyales sa gobyerno sa Malaysia.
Mapasalamaton ang gobernador nga positibo ang tubag sa nasud aron motabang sa probinsiya.
“Nanawag ko nga kung pwede mahatagan ta og rescue kung wala na jud tay fuel nga magamit para sa atong probinsiya. Gitubag man pud ang atong hangyo nga just in case nagkinahanglan ang atong probinsiya og tabang andam sila nga motabang,” sulti ni Kuya Gob.
“Dako ang atong pasalamat kay dapat karon naa na tay long preparation nga ginatan-aw. Hopefully mahuman na unta ni nga problema. Pero, kung dili, naa tay initiative nga ato nang giplano daan,” dugang sa gobernador.
Kahinumduman nga mibisita si Kuya Gob sa Malaysia sa milabay nga bulan tingod sa imbitasyon sa hari sa Johol District sa State of Negeri Sembilan sa Malaysia
Kauban ang pipila sa mga department heads sa Kapitolyo ug mga opisyales sa Island Garden City of Samal, tumong sa iyang biyahe ang pagpalig-on sa relasyon ug pag-abli sa mga oportunidad sa kolaborasyon tali sa duha ka lugar, nga pabor sa ekonomikanhong paglambo sa probinsiya.
Naa nay skedyul si Kuya Gob sa mga mayores ug mga kapitan aron hisgutan ang mga contingency measures nga ipatuman, aron sa pagpangandam para mamenosan ang epekto sa crisis sa ekonomiya ug katawhan sa Davao del Norte.
“Maningkamot ta karon nga ang provincial government makatigum ta og reserve nga gasolina ug diesel para nga kung wala nay delivery ug short na jud ang supply naa pa tay magamit,” ingon niya
Nanawagan sab siya sa katawhan nga magtanum sa mga gulay ug lagutmon aron siguro nga dunay makaon kung modugay ang crisis.
“Padayon ta sa pag-tanum kay ang importante ang pagkaon. Wala man tay mode of survival kundili ma-maintain nato ang pananum para nga mismo sa atong tugkaran naa tay pagkaon,” panapos sa gobernadora.
