Gipangunahan ni Governor Edwin “Kuya Gob” Jubahib ang delegasyon sa Rehiyon Onse kon Davao Eagles atol sa opisyal nga pag-abli sa Palarong Pambansa 2026 sa D.O. Plaza Sports Complex, Agusan del Sur karong adlawa, Mayo 24.

Miparada ang 1,067 ka mga atleta nga mirepresenta sa Davao Region sa opening ceremony niini, kung asa aktibo nilang gipakita ang ilang kadasig sa pakigbisog alang sa kampyeonato.

Sulti ni Governor Jubahib, migahin og kapin ₱500,000 ang iyang administrasyon alang sa DepEd isip suporta sa mga atletang Dabaonon. Nakadawat usab og ₱11,000 ang matag atletang gikatakda nga moapil sa Palarong Pambansa.

Giawhag usab ni Jubahib ang mga atleta nga ipatigbabaw ang sportsmanship sa matag sporting event, diin iya silang gipahimumdoman sa islogan nga “Kalaro kita, hindi kaaway”.

Kuyog ni Jubahib sa pagpangulo sa delegasyon sa Rehiyon Onse si Vice Governor Clarice Jubahib, mga Sangguniang Panlalawigan Board Members, DepEd XI Regional Director Allan Farnazo, ARD Rebonfamil Baguio, ug mga PG Department Heads sa Kapitolyo, isip pagpakita sa ilang bug-os nga suporta sa mga atletang Dabaonon.