Pormal nga gisugdan ang pagsaulog sa National Women’s Month sa probinsiya sa Davao del Norte ubos sa temang “Lead Like the Babaylan, Filipinas!”, lakip ang pagpasidungog sa mga atleta sa DavNor Pioneers nga nakab-ot og gold, silver, ug bronze medals sa DAVRAA Meet 2026, sa gipahigayon nga Convocation Program sa Kapitolyo alang sa bulan sa Marso.

Alang sa selebrasyon sa National Women’s Month, gihatagan og importansya ni Public Service Officer II Arlan Labrador ang papel sa mga kababayen-an sa katilingban.

“Dako kaayong papel ang kababainhan diha sa pagtapok sa kalamboan sa atong community. Dili lang ta magcelebrate [sa ila], we are here to recognize Dabaonon women,” sulti ni Labrador.

Giila usab ni Governor Edwin “Kuya Gob” Jubahib ang kusog sa mga kababayen-an, diin iyang gitawag ang kasamtangang panahon isip usa ka “new era.”

“Ang tanan na kaya sa kalalakin-an, kaya usab sa kababayen-an, isa mo sa naghatag og dakong kusog sa atong probinsiya ug sa atong nasod,” sulti ni Kuya Gob.

Sa maong programa, gipasidunggan usab sa Probinsiyal nga Panggamhanan ang mga atleta ug coaches sa DavNor Pioneers, tungod sa ilang mga nasakmit sa bag-o lang nahuman nga DAVRAA Meet 2026.

Gi-deklara nga overall champion sa Paragames Category ang DavNor Pioneers nga nakatigom og 23 ka gold, 21 ka silver, ug 9 ka bronze medals. Samtang, nakab-ot niini ang second place overall sa regular games pinaagi sa 67 ka gold, 55 ka silver, ug 81 ka bronze medals.

Isip pagpasalamat sa mga nasakmit sa atleta, gipahibalo ni Jubahib nga adunay napasa nga bag-ong ordinansa diin ang matag gold medalist makadawat og ₱10,000; ang silver medalist ₱4,000; ug ang bronze medalist ₱2,000 matag-usa.

“Ang inyong kahago ug dedikasyon sa paglaban isip usa ka atleta, gihatagan nato og dakong pagtagad sa Provincial Government of Davao del Norte. Congratulations sa inyong tanan, sa mga athletes ug coaches, thank you for a job well done,” dugang pa sa gobernador.

Writers : Rowella Pearl Sabasaje and Marinelle Berenguel, DNSC BaComm Interns