Prayoridad ni Governor Edwin "Kuya Gob" Jubahib ang kahimsog sa mga empleyado sa Kapitolyo pinaagi sa paghatag og libreng annual physical examination (PE), eye care, chest X-ray ug dental services.

Ang annual PE sa mga empleyado gisugdan ni Kuya Gob niadto pang nilabay’ng mga tuig, aron masiguro ang kabaskog ug pagka-produktibo sa mga kawani.

Gi-obliga napud ni Kuya Gob, nga mapailawom sa libreng chest x-ray ang tanang empleyado aron masanta ang sakit nga Tuberculosis (TB) ug mapanalipdan sila ug ang mga katawhan nga ilang gi-alagaran.

"So compulsory ang tanan para ato ning ma prevent nga kung ma found out nga positive mo sa x-ray, matambalan dayun nato, dili pa mulala ang sakit ug dili mo spread dinhi sa atong Probinsya ug dili makatakod sa atong mga constituents sa Davao del Norte. Being a provincial government employees kitang tanan ang model sa atong probinsya," ingun ni Kuya Gob

Pila ka tuig na nga abri ang medical clinic sa Kapitolyo alang sa ubang konsultasyon sa mga trabahante. Ug himoon napud nga available ang psychiatric clinic kaduha matag bulan aron mahatagan og propesyonal nga pagtagad ang bisan unsang mental health concerns sa mga empleyado. Paga-abrihan usab ang dental clinic nga maghatag og libreng serbisyo alang sa tanang empleyado.

Sa paglingkod ni Vice Governor Clarice Jubahib isip acting Gobernador atol sa pagbyahe ni Kuya Gob sa Malaysia sa nilabay’ng bulan, iyang gimando ang paggahin og duha ka oras ug tunga matag semana o 30 minutos kada adlaw, alang sa physical fitness and sports activity sa mga empleyado.

Gisiguro sa administrasyong Jubahib-Jubahib ang maayong panglawas sa mga empleyado sulod sa kapitolyo tungod dinhi magsugod ang kalig-on sa probinsyal nga panggamhanan sa Davao del Norte.