Gipangunahan ni Provincial Social Welfare and Development Officer Rosalinda Rapista ang pagtunol sa mga plaque of recognition sa ngalan sa Probinsyal nga Panggamhanan sa Davao del Norte ngadto sa nagkalain-laing ahensya sa gobyerno, mga departamento sa kapitolyo ug mga pribadong sektor atol sa pagsaulog sa ika-24 ka tuig sa Women Development Center (WDC) nga gipahigayon sa Purok 2, Poblacion, New Corella, niadtong Marso 10.
Gihatag sa kapitolyo ang maong pasidungog isip pagpasalamat sa padayon nga suporta sa mga ahensya ug organisasyon nga nagtabang sa operasyon sa pasilidad. Sa pagkakaron, adunay napulo ka mga residente sa WDC mga kabataang kababayen-an nga nidangop ug nipasilong sa pasilidad human mabiktima sa pagpangabuso, samtang padayon pang gidungog sa korte ang mga kaso.
Gisaulog ang kasumaran ubos sa tema nga “Pagpalig-on sa Kababayen-an: 24 ka Tuig sa Inklusibong Aksyon.” Lakip sa mga gipasidunggan nga ahensya ug organisasyon mao ang Provincial Prosecutor's Office, Provincial Assessor's Office, ang Municipal ug Provincial Health Offices, Tagum Cooperative, Marlex Inland Resort, ug Soroptimist International of Golden Tagum, lakip pa ang uban pang institusyon.
Gisugdan ang kalihokan pinaagi sa Santos nga Misa ug gisundan dayon sa pormal nga programa nga gitambongan sa mga representante ni Governor Jubahib ug Mayor Jorjan Federiso sa New Corella.
Atol sa programa, gilayon usab gihimo ang pagpanumpa sa mga napiling opisyal sa Friends of WDC atubangan ni Jimmy Boco, Presiding Judge sa Branch 2 Family Court. Gipangulohan ni Panpilo Pamugas ug ni Konsehal Jeffrey Calamonggay ang maong grupo.
Sa iyang mensahe, giingon ni Judge Boco nga ang mga kaso sa pagpangabuso ilabi na batok sa mga kabataan nga unta mahukman na sulod sa napulo ka bulan, ug ang balaod sulti niya matinud-anon ug aktibo nga nanalipod sa mga biktima.
Samtang, gipadayag sab ni Rapista nga sukad natukod ang WDC sulod sa 24 ka tuig na ang milabay, mokabat na sa 324 ka kababayen-an ang nidangop sa pasilidad aron mangayo og proteksyon ug tabang. Gipasabot usab niya nga padayon ang lig-on nga suporta ni Gobernador Jubahib sa mga biktima aron masiguro nga makab-ot nila ang hustisya.
