Nagpalig-on ang Probinsyal nga Panggamhanan sa Davao del Norte (PLGU DavNor) sa iyang koleksyon ug naglatid og mas epektibong mga pamaagi aron mapauswag ang panudlanan sa probinsya alang sa tuig 2027. Subay niini, nagpahigayon ang probinsya og Income Estimates Formulation and Income Hearing sa Bulwagan ng Karunungan, Government Center, Mankilam, Tagum City niadtong Pebrero 12.
Gitambongan sa mga division ug department heads sa kapitolyo ang maong kalihukan sa pagpanguna ni Governor Edwin I. Jubahib nga girepresentahan ni Provincial Administrator Atty. Ralph Dela Cruz. Mitambong usab si Board Member Janris Jay Relampagos, Chairperson sa Committee on Finance, Budget and Appropriation sa Sangguniang Panlalawigan.
Gipasabot ni Provincial Administrstor Atty. Dela Cruz ang panginahanglan nga mapauswag ang sistema sa probinsya aron mas mapalapad ang serbisyo sa katawhang Dabaonon. Iyang gitandi ang probinsya sa ubang mga lugar nga nakahatag og mas halapad nga serbisyo sama sa imprastraktura, pagbutang og CCTV sa mga kalsada, paghatag og daghang scholarship, ug pagpalig-on sa social services tungod sa ilang dako nga lokal nga kità nga milabaw pa sa pundo nga gikan sa nasyonal nga gobyerno. Sumala kaniya, ang pagpalig-on sa income generation maghatag og mas lig-on nga pundasyon sa pagpalambo sa probinsya.
Sa presentasyon, nasayran nga ang actual income sa Provincial Assessor’s Office (PASSO) sa tuig 2025 gikan sa tax declarations, land holding certificates, ocular inspection, ug appraisal miabot sa P1.2 milyon. Gitarget sa Provincial Treasurer’s Office (PTO) nga mosaka kini sa kapin P1.3 milyon alang sa 2027.
Samtang, ang actual income sa Provincial Economic Enterprise Development Office Davao Del Norte (PEEDO-DDN)Hospital sa 2025 miabot sa P339 milyon, ug gilauman nga mosaka kini sa P412 milyon sa 2027. Naglangkob kini sa tulo ka district hospital zones sa Kapalong, Carmen, ug Island Garden City of Samal. Gipahayag ni Dr. Dominic Basalo sa Provincial Health Office nga posible nilang makab-ot ang target ilabi na kon madugangan ang bed capacity sa mga district hospital. Bisan pa sa pagpatuman sa zero billing program, nagpadayon ang income pinaagi sa blood services fees ug uban pang hospital services.
Nagpakita usab og positibong paglantaw ang ubang mga departamento. Ang Provincial General Services Office (PGSO) nagpadayon sa pag-auction sa mga unserviceable properties ug pagkolekta sa bidders registration fees. Nagtala usab og koleksyon gikan sa Real Property Tax, basic amusement tax, delivery trucks and vans, ug uban pang bayranan og buhis.
Base sa komputasyon sa Provincial Treasurer’s Office, gitarget sa probinsya nga mosaka ang income estimates ngadto sa P4.2 bilyon sa 2027, gikan sa actual income nga P3.4 bilyon sa 2025. Pinaagi sa mas pinalig-on nga koleksyon ug episyenteng pagdumala sa pundo, determinado ang PLGU DavNor nga mas mapalambo ang serbisyo publiko ug masiguro ang malungtarong kalamboan sa probinsya.
