Lakip ang 105 ka mga ordinansa ug 788 ka mga resolusyon ang gibida ni Vice Governor Clarice “Clang-Clang” Jubahib nga kalampusan sa Sangguniang Panlalawigan (SP) sulod sa unang pito ka bulan sa iyang pagdumala.
Sulti sa bise gobernadora nga kini nagapakita sa kusog sa panaghiusa ug pagtinabangay sa SP ug sa tanang kawani sa probinsiya.
“Kini dili lang listahan sa mga nabuhat sa SP, kundili usa ka pagpamatuod sa mga paningkamot, kooperasyon ug dedikasyon sa matag-usa,” sulti ni VG Clarice, atol sa Convocation Program sa Kapitolyo sa bulan sa Pebrero ganinang buntag.
Apil sa mga landmark legislations sa SP ang ordinansa sa Revised Rules of Procedure Governing Administrative Cases Before the SP, pagmugna ug paghatag pondo alang sa Tipanud Festival Management Committee, pagpahimutang sa Davao del Norte Youth Assessment Study, pagmugna sa Provincial Public Employment Service Office (PESO), amendment sa DavNor KAAGAPAY Program Ordinance, institusyonalisasyon sa Provincial ALS-Lympics, pag-aproba sa P2-billion Loan Agreement sa probinsiya sa Land Bank of the Philippines, ug uban pa.
Gihatagan sab og gibug-aton sa bise gobernadora ang kalampusan sa iyang inisyatibo nga pakighimamat sa mga lain-laing mga opisyales ug komunidad, nga nagtumong sa pagpalig-on sa relasyon tali sa probinsiya ug mga local government unit niini.
Kini sugod pa lang, ingon ni VG Clarice, samtang iyang gisaysay nga ang unang pito ka bulan usa ka yugto sa pagkat-on, paglig-on sa sistema ug pagsumpay sa mga tumong “nga ang matag-desisyon o matag-polisiya nga atong pagabuhaton magdala og kaayohan sa katawhan”.
Sa mensahe ni Kuya Gob Edwin Jubahib, nga gibasa ni Provincial Administrator Atty. Ralph Dela Cruz, sulti sa amahang gobernador nga ang daghang kadaugan sa SP kini usa ka selebrasyon sa panag-uban, katuyuan, ug hiniusang responsibilidad.
“It affirms that when laws are crafted in foresight and compassion, and when legislation is firmly anchored of the actual condition on the ground, progress becomes inclusive and improving,” sulti niini.
Lakip sab sa highlight sa Convocation Program ang paglusad sa ICT Policy Manual, Computer Emergency Response Team Manual, ug Business Process Flow and Detailed Procedures of ICT Assets sa Probinsiyal nga Panggamhanan sa Davao del Norte.
