Ginatukod na sa Aala Road, Mankilam, Tagum City ang pinakauna nga Artificial Football Turf sa probinsiya, isip suporta sa mga Dabaonong atleta ug kabataan nga nangandoy mahimong hanas sa isport nga football.

Nagkantidad og P10,000,000 ang maong proyekto nga gipondohan sa ASEAN Football Federation pinaagi sa Philippine Football Federation (PFF) ug gi-award sa North Davao Regional Football Association, Inc.

Gitambongan mismo ni PFF President John Anthony Gutierrez ang ground breaking ceremony niini niadtong Enero 17, ug mibatbat sa ilang mga plano sa pagpalig-on sa maong isport pag mahuman na ang turf.

“The PFF, through its regional football associations, has grassroots programs and initiatives that are implemented… Once the fields are completed, we will be more aggressive in trickling down industry-standard performance and development programs to be able to utilize the infrastructure that we invested in. So pag nagawa na ang field, talagang magpupursigi tayo na itaas ang level ng football,” ingon ni Gutierrez.

Dugang usab ni Gutierrez, artificial turf ang gitukod dinhi sa siyudad aron magamit kini sa mga atleta sa bisan unsang matang sa panahon. Dungag niya, pag makompleto na ang proyekto, magpadala ang PFF sa probinsiya og mga pro-licensed nga mga eksperto gikan sa ubang nasud aron matudloan dili lamang ang mga atleta, kundili pati na ang mga coaches, sulod sa unom ka bulan.

Gi-awhag usab ni Gutierrez ang mga atleta ug mga interesado nga kabataan na pahimuslan ang maong proyekto tungod libre lamang kini alang sa tanan.

“Hinihikayat po namin ang mga bata, mga magulang, to take up football as sports if you haven’t done yet. Meron na po tayong magandang facility na rain or shine, literally magagamit… [We have a] world-class facility for us to develop world-class athletes. This is again available to anyone who wants to put in the hard work to become a footballer and a national team member. And we hope that the future national team players will come from regions like this one,” sulti ni Gutierrez.

Dako usab ang pagpasalamat ni Provincial Sports and Youth Development Officer Giovanni Gulanes sa PFF tungod kay natinuod na ang usa sa mga damgo sa probinsyal nga panggamhanan pinaagi sa maong proyekto. Gipaabot usab niya ang suporta ni Governor Edwin “Kuya Gob” Jubahib niini, ingon nga hingpit ang pasalig sa iyang administrasyon nga paluyohan ang kalamboan sa isports sa probinsiya.

Ang yuta diin nahimutang ang proyekto gidonar sa pamilya Aala, kinsa mitambong usab sa gipahitabong ground breaking ceremony.