Sa milabay nga tulo ka adlaw, malampusong gipahigayon sa Probinsyal nga Panggamhanan sa Davao del Norte ang pinaka-unang “Walk the Fault” activity sa probinsiya aron masuta ug masabtan ang kahimtang sa mga active fault lines nga anaa sa nagkadaiyang lugar sa DavNor.
Kabahin sa maong kalihokan ang personal nga pagbisita sa mga partisipante sa tulo ka identified active fault lines sa probinsiya isip kabahin sa pagpalig-on sa disaster preparedness ug mitigation efforts sa lokal nga panggamhanan. Human niini, gisundan dayon kini sa usa ka Writeshop Activity diin gitigom ug gi-organisa sa mga partisipante ang tanang datos nga ilang nakuha atol sa field activity.
Matod ni Local Disaster Risk Reduction and Management Officer III Manggob Revo Masinaring, kini ang pinaka-unang “Walk the Fault” sa Davao del Norte. Gipunting niini ang pagbisita sa tulo ka active fault lines nga mao ang Colosas-Talaingod Fault, Gupitan Fault ug ang West Compostela Valley Fault.
Ang Colosas-Talaingod Fault maagian ang Barangay Palma Gil ug Barangay Sto. Niño sa Talaingod, Barangay Tulalian sa Sto. Tomas, ug Barangay Lower Panaga sa Panabo City. Samtang, ang Gupitan Fault nahimutang sa Barangay Gupitan sa Kapalong. Ang West Compostela Valley Fault usab naglakop sa Barangay Sta. Fe sa New Corella ug ang Barangay Bu-an ug Brgy. Camansa sa Munisipyo sa Asuncion.
Dugang pa ni Masinaring, duha ka nag-unang proseso ang ilang gipahigayon atol sa maong kalihokan. Una, ang demarcation o pagmarka sa aktwal nga lokasyon sa mga fault line lakip na ang pagpang-interbyu sa mga residente nga nagpuyo duol niini. Ikaduha, ang Information Education Campaign alang sa mga stakeholders aron mapalawom ang ilang kahibalo mahitungod sa kahimtang sa mga fault ug sa posibleng risgo panahon sa linog.
Gipasabot usab ni Masinaring nga ang maong report mahimong mahinungdanong giya sa mga opisyales sa probinsiya sa pagplano sa hustong mga pamaagi aron mas maandam ang komunidad batok sa posibleng mga katalagman resulta sa kusog nga linog.
Atol sa ilang pagbisita sa mga lugar nga adunay active fault lines, ilang nadiskobrehan nga adunay mga kalsada, kabalayan ug nagkadaiyang establisyemento nga direktang nahimutang ibabaw o duol sa mga active fault lines.
Tumong sa maong writeshop nga makahimo og organisado ug mahinungdanong datos nga mahimong basehan sa strategic disaster preparedness ug mitigation plans sa Probinsyal nga Panggamhanan sa Davao del Norte.
Gipartisiparan ang kalihokan sa nagkadaiyang local government units ug national government agencies lakip ang Department of Science and Technology - Philippine Institute of Volcanology and Seismology (DOST-PHIVOLCS), DOST-Davao del Norte ug Office of Civil Defense Region XI. Miapil usab ang nagkadaiyang opisina sa Kapitolyo sama sa Provincial Disaster Risk Reduction and Management Office, Provincial Planning and Development Office, Provincial Social Welfare and Development Office, Provincial Engineering Office, Provincial Environment and Natural Resources Office, ug Provincial Administrator’s Office-Special Programs and Projects Division.
Padayon nga ginaawhag sa Probinsyal nga Panggamhanan sa Davao del Norte ang katawhan nga magpabiling alerto ug kanunay maminaw sa mga pahimangno kabahin sa mga katalagman aron kanunayng andam sa bisan unsang emerhensiya.
