Layon nga gitunolan og hinanaling tabang sa Probinsiyal nga Panggamhanan sa Davao del Norte ang mga nabiktima sa sunog nga miugdaw sa 17 ka mga panimalay sa Purok 8B Magdum, Tagum City, karong adlawa, Enero 19, 2026.

Sa pagpanguna sa Provincial Social Welfare and Development Office, inubanan sa opisina ni Vice Governor Clarice Jubahib, gitunolan ang mga apektado nga indibidwal og mga kagamitan sama sa domestic items lakip banig, kaldero, ug hygiene kit na pwede nila magamit samtang gapundo pa sila sa ilang mga bakwitanan.

Nanghatag usab ang probinsiyal nga panggamhanan og 20-kilos bugas ug canned goods sa mga pamilya.

Sulti ni Purok Chairman Emily Diwara, gisuspetsahan nga kadaot sa wiring ang hinungdan sa sunog nga niulbo kaganinang buntag. Muabot sa 29 ka pamilya o 93 ka mga indibidwal ang apektado niini.

Dungag niya, nanginahanglan gayud ang mga biktima og masilongan sa mga sumusunod nga mga adlaw.

“Kinahanglan jud nila og matulogan. Mao gyud na. Naa nay nahatag ang PSWDO, mga ahensya ug mga nagkalainlaing grupo nga mga pagkaon ug uban pa. For the meantime lang pud na kay wa mi kabalo kung hantod kanus-a ni taman… Kung naa’y mapuy-an na mas taas-taas, kana lang jud among hangyo nga mahatag temporarily,” sulti ni Diwara.

Wala pa’y tarong nga mga relocation site ang mga apektado sa sunog, maong gimandoan dayon ni Governor Edwin “Kuya Gob” Jubahib ang PSWDO sa pagtino sa tanang mga pamilya nga dapat mahatagan og emergency shelter assistance, lakip na sa paghatod sa ilang mga nag-unang panginahanglan.

Mipaabot usab ang opisina sa bise gobernador nga andam sila maghatag og tabang sa tanang mga biktima. Mubalik ang grupo sa PLGU sa mga sumusunod nga adlaw aron ihatag ang uban pang panginahanglan niini.