𝗗𝗔𝗩𝗔𝗢 𝗗𝗘𝗟 𝗡𝗢𝗥𝗧𝗘 — Gipadayag ni Governor Edwin “Kuya Gov” Jubahib ang iyang interes sa mga renewable ug sustainable energy projects nga gitanyag sa South Korean business delegation atol sa ilang courtesy call sa Probinsyal nga Panggamhanan sa Davao del Norte karung adlawa, Enero 15, 2026.

Gihisgutan sa maong miting ang posibleng business partnership kalabot sa solar farm, bio-gas generators, ug water treatment projects nga makatabang sa pagpalig-on sa supply sa kuryente ug limpyo nga tubig sa probinsya.

“Davao del Norte is open for business, open for partnerships, and ready for shared success. We are not only looking for investors, but for long-term partners who share our vision of responsible enterprise and sustainable development,” sulti ni Kuya Gov.

Sumala sa Korean investors, ang solar farm project nagkinahanglan og dako nga luna diin usa ka ektarya ang katumbas sa usa ka megawatt nga solar power. Lakip usab sa plano ang water treatment project pinaagi sa storm water pump station ug sewage treatment plant aron masiguro ang igo ug limpyo nga potable water sa Davao del Norte, samtang gisugyot usab ang bio-gas treatment project nga nagtinguha nga maminusan ang problema sa landfill ug makahimo og enerhiya gikan sa basura.

“We are looking forward for more electricity supply [to] help solve the problem in electricity not only in the province but also in the whole Mindanao, “ sulti ni Kuya Gov.

Kahinumduman usab nga hugot ang pakigbisog ni Kuya Gov nga makatagamtam ang mga Dabaonon og mainom ug limpyo nga tubig.

Sa maong panagtapok, mitambong sila Vice Governor Clarice Jubahib, Mindanao Development Authority Assistant Secretary Romeo Montenegro, Provincial Administrator Atty. Ralph P. Dela Cruz ug uban pang personahe sa Probinsyal nga Panggamhanan.

Human sa miting, mibisita ang delegasyon sa Hijo Banana Plantation ug Anflo Industrial Estate arun makita ang dagko nga plantasyon sa probinsya nga adunay potensyal ug posibleng kalambigitan sa mga proyekto.