Aron matabangan ang mga pamilyang naapektuhan sa pagbaha tungod sa kusog nga pag-ulan niadtong Mayo 26, 2026, mipahigayon og disaster relief operation ang Probinsyal nga Panggamhanan sa Davao del Norte sa Barangay Tanglaw ug Sitio Bugtong Talisay sa lungsod sa Braulio E. Dujali niadtong Mayo 29, 2026.
Kapin sa 506 ka mga apektadong pamilya ang nakadawat og tabang gikan sa probinsya, diin ang 440 niini gikan sa Barangay Tanglaw ug 66 ka pamilya gikan sa Sitio Bugtong Talisay.
Gipadali ni Governor Edwin “Kuya Gob” Jubahib ang paghatod sa ayuda human niya masayran ang lisod nga kahimtang sa mga residente nga naapektuhan sa kalamidad.
Sumala kang Provincial Social Welfare and Development Officer Rosalinda Rapista, wala maglangan ang probinsya sa pagresponde sa hangyo sa mga lumulupyo.
“Wala nato gituyo nga magbaha. Nadawat nato ang inyong sulat gahapon ug ako dayon kining gipasang-at kang Kuya Gob Edwin I. Jubahib. Ang iyang instruction sa akoa, ‘Rose, ayaw pagdugay, ihatag dayon ang tabang,’” ingun ni Rapista.
Gidugang niya nga matag pamilyang adunay coupon makadawat og lima ka kilo nga bugas ug mga de-lata isip hinanaling tabang sa ilang panginahanglan.
Samtang, gipasalamatan ni Vice Governor Clarice Jubahib ang mga residente sa ilang pagsalig sa gobyerno ug gipasabot nga padayon ang paningkamot sa probinsya sa paghatod og tabang ngadto sa mga naapektuhan sa kalamidad.
“Naningkamot gyud mi nga kani among dala makatabang sa inyohang pang-adlaw-adlaw ilabi na karon nga motindog napud mo’g balik. Paningkamotan namo nga inyong saligan ang inyong gobyerno kay naningkamot pud mi nga naa tay proyekto nga flood-control aron maminusan ang pagbaha dinhi sa Davao del Norte,” Sulti ni Vice Governor Jubahib.
Gipasalig usab sa bise-gobernadora nga ang giplanong flood-control projects sa probinsya tinud-anay ug alang sa kaayohan sa katawhan aron mahatagan og solusyon ang problema sa pagbaha sa mga komunidad.
Nagpasalamat usab si Braulio E. Dujali Mayor Margarita Rubinos kang Governor Jubahib ug VG Clarice alang sa dali nga paghatag og tabang sa iyang mga katawhan.
“Salamat kaayo, Gob, sa inyong tabang sa akong katawhan. Nag-andam pud mi og budget alang sa flood-control apan naa man say planong tabang gikan sa probinsya, unahaon sa nato ni, ug among sundan dayun pinaagi sa budget sa LGU,” matud ni Mayor Rubinos.
Padayon ang paningkamot sa Probinsya sa paghatod og hinanaling serbisyo ug pagpalig-on sa mga programa ug imprastraktura aron mapanalipdan ang mga komunidad batok sa epekto sa mga kalamidad.
