Gipangunahan ni Governor Edwin “Kuya Gob” Jubahib ang makasaysayong paglusad sa 1,015-meter submarine cable nga nagkonektar sa Island Garden City of Samal (IGaCoS) ngadto sa Davao City karong hapon, Abril 17, 2026.

Ang 69kV submarine cable, nga dunay 50MW capacity, giingon nga mosulbad sa dugay nang problema sa kuryente sa dakbayan ug magpalig-on sa power supply alang sa mga panimalay, negosyo, ug turismo sa isla.

Kauban ni Kuya Gob sila Anton Perdices, Chief Operating Officer (COO) sa AboitizPower Distribution Utilities, Engr. Enriczar Tia, President and COO sa Davao Light and Power Company, Inc., Dir. Ollie Dagala, Mindanao Development Authority (MinDA) Area Management Office-Northern Mindanao Chief, Cary Lagdameo, Vice President sa Damosa Land, Inc., Vice Governor Clarice Jubahib ug mga miyembro sa Sangguniang Panlalawigan, Mayor Lemuel Reyes, ug mga opisyales sa Samal.

Butyag ni Engr. Tia nga kaya sa kable nga makasuplay sa upat ka beses sa peak demand sa Samal nga 12MW aron sa lig-on ug kasaligan nga kuryente sa isla.

“As we have promised and committed, Davao Light is here to provide reliable service. With the energization of the cable… there will be power coming from the mainland Davao, which is fairly stable and very adequate,” sulti sa presidente sa Davao Light.

Saysay ni Kuya Gob nga dala sa maong proyekto ang katumanan sa dugay nang damgo sa mga Samalenos nga maayong serbisyo ug ubos nga singil sa kuryente nga susi sa paspas nga paglambo sa isla.

“Ang atong gi-fight nga magkaroon og stable nga supply sa kuryente, efficient nga serbisyo sa kuryente, affordable rate of electricity mahimong matuman na ang tanan. Ug ma-attract pa ang daghang mga negosyo nga makahatag og dugang employment ug dugang development for the economy in the island.

Pasalig sab sa gobernador nga sunod niyang tutukan ang problema sa supply sa tubig sa isla, nga usa sab sa nag-unang panginahanglanon sa paglambo sa ekonomiya ug pag-uswag sa kinabuhi sa katawhan.