Kuya Gob, VG Clarice mihatag incentives sa mga DAVRAA medalists
- Details
- Published: Tuesday, 19 May 2026 08:26
- Written by pioDavNor
- Views: 13
Sa pagpaningkamot nila Governor Edwin “Kuya Gob” Jubahib ug Vice Governor Clarice Jubahib, naaprubahan ang supplementary budget nga ₱1.4 milyon aron mahatagan og cash incentives ang mga DAVRAA medalists nga milahutay sa DAVRAA 2026, niadtong Mayo 14, 2026.
Nakulangan ang unang ₱1.7 milyones nga pondo tungod sa kadaghan sa mga nakadaog nga atleta, lakip na ang 67 ka gold medalists. Maong misaka sa ₱3.2 milyones ang kinatibuk-ang badyet human kini maaprubahan.
Nakadawat og ₱10,000 ang matag gold medalist, ₱4,000 ang silver medalists, ug ₱2,000 ang bronze medalists.
Parehas usab nga benepisyo ang nadawat sa para-athletes ug regular athletes, ingon man sa individual ug team events. Buot pasabot, bisan team event sama sa volleyball, matag miyembro sa nakadaog nga team ang makadawat gihapon sa bug-os nga incentive.
Matod ni Provincial Sports and Youth Development Officer Giovannie Gulanes, wala mosugot ang gobernador nga tungaon lamang ang unang budget aron matuman gayud ang gisaad nga incentives para sa mga atleta.
Dako usab ang pasalamat ni Division Sports Officer Arnel Labasan sa padayon nga suporta sa kagamhanan.
“Dako kaayo ko og pagpasalamat sa ilahang suporta kay even unsa amoang ginapangayo sama sa pinansyal assistance, naa gyud,” sulti ni Labasan.
Mapasalamaton usab ang mga batang atleta sa probinsyal nga panggamhanan sa ilang nadawatan nga incentive. Matod nila, dakong tabang kini aron mas mapalambo pa ang ilang pagdula sa umaabot nga mga kompetisyon.
“Of course po, I am very thankful kay naa mi kwarta nga maka-motivate sa amo ug naa pud mi ma-allowance sa palaro ug sa mga next namo nga dula,” ingun ni Czarina Cavite, usa ka swimmer.
“Super supportive kaayo sila sa amoa po. Super thankful kaayo ko kay diri ko sa Davao del Norte nakapuyo. Sa akong next game, maningkamot lang jud ug kugi," sulti ni Ruth Mae Teodocio, usa ka mandudula sa athletics.
Nagpasalamat usab si Josephine Pullido, ginikanan sa duha ka batang boxingero nga sila Jedlee Tomas nga gold medalist ug Taj Tomas nga bronze medalist, tungod sa incentives nga nadawatan.
“Pasalamat jud ta karon kay nakakuha ta og incentives. Tungod ani nga sports, nalayo sila sa dili maayong ehemplo ug na-focus jud sila sa sports,” sulti ni Pullido.
Dugang pa niya, plano sa iyang mga anak nga paliton ang ilang dugay nang gipangandoy nga sapatos.
“Kadtong Division Meet, niingon siya nga wala siyay sapatos. Gikumot jud akong kasing-kasing ato kay wala pud koy ikapalit. Karon, pinaagi sa incentives, makapalit na jud sila og fighting shoes,” sulti ni Pullido.
