Gisulti ni Senior Assistant Vice President Arnel Bernabe sa Davao Light and Power Company (DLPC) nga kanunay andam ug motagana ang maong kompanya sa pagtubag sa mulo sa mga residente-konsumidor sa Island Garden City of Samal (IGACOS). Iya kining gipamatud-an pinaagi sa presentasyon sa datus nga nagpakita sa ilang dinaliang aksyon sa suliran sa kuryente sa maong isla sa nagpadayong transisyon. Gihimo kini ni Bernabe atol sa gipahigayong miting sa Committee of the Whole sa Sangguniang Panlalawigan ubos sa pagpanguna ni Vice Governor Clarice T. Jubahib sa Legislative Building, Provincial Capitol, Mankilam, Tagum City niadtong Abril 13.
Gipatawag ang miting aron hisgutan ang nagpadayon nga mga isyu sa suplay sa kuryente nga giatubang sa mga residente, labi na sa kalibog kung asa magabayad ang mga katawhan sa ilang power bill.
“As of April, 84% sa mga tawag ni customer marespondehan dayon namo within 30 minutes. So, naa la’y pipila nga dili marespondehan dayon kay labi na’g daghan kaayo. But it’s big number na comparing it to the statistics we have in Davao,” matud ni Bersabe.
Iya usab gipasabot nga modangat pa’g pipila ka minuto ang ilang pagtrabaho sa area gumikan ra usab sa dakong danyos labi na’g poste ang mabanggaan.
“65% is ma-restore nato ang power ni customer within nine minutes. Naa’y pipila pud nga dili nato ma-deliver within 90 minutes kay dako ang nature sa trabaho. Pareha nang posteng nabanggaan or naa’y kinahanglan kambyohan nga equipment,” ingon sa opisyal.
Giklaro usab sa taga-DLPC nga nagsugod na sila sa pagkolekta sa power bill sa Samal sa tanang konsumante sa kuryente sa Isla.
“We will start collecting bills na sa Samal. So, why is that so? So, mag-bill na mi sa tanang customers. When we say tanan, tanan ni siya, the 42 barangays of Samal kay wala pa man ang Talicod,” sumala ni Bersabe.
Samtang, gipasabot usab ni Dr. Demetrio Jagunos nga nagrepresenta sa Northern Davao Electric Cooperative, Inc. (NORDECO) nga ang ilang gikolektahang mga konsumante ang adunay tulo ka bulan nga arrears.
“Kung naa ma’y nibayad sa 26, kung wala ko nasayop, we have to check the record. Kadto ning naa’y bayronon tag three months arrears nga niduol sa amoa, nga niadto previous. Amoa gyud ginadawat kay kung didto ni sila mobayad sa Davao Light unya malimtan to. Amoa man to,” matud ni Dr. Jagunos.
Ang kalibog sa konsumidor kung asa sila magbayad sa ilang bayronon sa kuryente sa NORDECO o sa DLPC, human ipatuman ang Writ of Possession niadtong Pebrero karong tuiga. Giaksyonan sa mga board member pinaagi matud pa sa pag-file sa resolusyon sa Sangguniang Panlalawigan aron awhagon ang duha ka partido nga tahuron ang bisan unsang opisyal nga resibo nga nadawat sa konsumante.
Gipasabot sa bise gobernador nga ang kaayohan sa tanang katawhan ang importante kanila uban sa pagkanayon nga kung nakabayad na ang mga konsumante ug aduna na’y opisyal nga resibo, dili na sila angay samokon o perwisyohon pa.
