Gipasiugda sa Palm Court Tagum ang usa ka Pickleball mini tournament nga gipartisiparan sa 24 ka mga pares nga magtiayon sa dakbayan atol sa selebrasyon sa Valentine’s Day. Giorganisa ang maong kalihukan ubos sa pagpanguna ni Atty. Hanniyah P. Sevilla kauban ang iyang grupo.

Madasigong nakigtigi ang matag magtiayon nga adunay nagkalain-laing bansag sama sa “Sweethearts,” “Lovebirds,” ug “Soulmates,” samtang bitbit ang ilang mga paddle. Sa wala pa magsugod ang matag duwa, gihimo sa mga partisipante ang espesyal nga pamaagi sama sa paghalok, paggakus, o pagkarga sa ilang asawa nakahatag og dugang kalingawan ug kasadya sa mga nanan-aw. Nagpadayon ang kulba ug kahinam gikan sa unang hugna hangtod sa championship round, diin daghang magdudula ang nagpakita sa ilang kahawod samtang ang uban nalingaw ug nagpasingot sa matag hapak sa bola.

Nagsugod ang torneyo alas nuwebe sa buntag ug nahuman alas tres sa hapon. Human sa mga duwa, gipahigayon dayon ang awarding ceremony aron ilhon ang mga mananaog. Nasungkit ang kampeonato sa magtiayong sila Anna Leah Mantalaba Bongcales ug Clark Eufemiano. Nakab-ot sa magtiayong Rey Rich Chan ug Charmin Jade Chan ang unang puwesto isip 1st Runner-Up, samtang nakuha sa magtiayong Jade Carillo ug Jassie Ajoc ang 2nd Runner-Up.

Nakadawat ang mga kampeon og libreng 24 oras nga pagpuyo sa Madayaw Hotel nga nahimutang sa Briz District, lakip ang Thai Boran Massage sa Apokon, Tagum City. Samtang, nakadawat usab og premyong salapi ug mga medalya ang mga nakadaog sa una ug ikaduhang dapit.

Pinaagi sa maong kalihukan, gipakita sa mga organisador ang ilang tinguha nga mapalig-on ang relasyon sa mga magtiayon, mapauswag ang pagtinabangay, ug mapalambo ang panaghiusa aron mabuntog ang bisan unsang hagit sa kinabuhi pinaagi sa pag-apil sa mga kalihukang pampaugnat sa kusog.