Human sa iyang daghang trabaho sa opisina, gi-inspeksiyon ni Governor Edwin “Kuya Gob” Jubahib kagahapong adlawa ang mga kalsada nga nadaot tungod sa landslide nga resulta sa mga pag-ulan nga dala sa shear line sa mga milabay’ng semana.

Gitagad ni Kuya Gob ang mga tawag sa mga barangay officials, partikularmente sa guba nga mga dalan sa Barangay Mambing, New Corella ug Barangay Sawata sa lungsod sa San Isidro.

Kauban sa gobernador si Acting Provincial Engr. Edwin Misa ug mga personahe sa Kapitolyo aron sa pagsuta sa daot nga mga dalan, nga nakaapekto sa kahimtang ug panginabuhi sa mga lumulopyo sa maong mga lugar.

Gimanduan dayon ni Kuya Gob ang Provincial Engineer’s Office (PEO) aron sa temporaryong maagian sa mga mananakay ug lumulupyo samtang ginaayo ang maong mga kalsada.

Kahinumduman nga 790 ka mga barangay ang apektado sa bag-ohay nga mga pagbaha ug landslide sa probinsiya tungod sa mga pag-ulan, nga naakaapekto sa 61,983 ka mga pamilya o 158,618 ka mga indibidwal.

Mokabat ngadto sa 288.7 million ang danyos sa agrikultura ug kapin P60 million sab ang kadaot sa imprastraktura.