Gilusad sa Land Bank of the Philippines (LandBank) ang bag-ong Davao del Norte Corporate Center niini aron sa tumong sa mas paspas nga paglambo sa lokal nga ekonomiya ug pag-uswag sa kabarangayan.
Sulti ni Marilou Villafranca, Executive Vice President on Branch Banking Sector, kini ang ikaduhang phygital branch nga gitukod sa Davao Region, segunda sa Davao City, gumikan sa lagsik nga kalihokan sa ekonomiya sa probinsiya nga mosuporta sa serbisyong pinansiyal sa bangko.
“This is the second phygital branch that we have established (in Davao Region) because we believe Davao del Norte already has the development and the economic activity to support the financial services in this area,” sulti niya.
Isip usa ka phygital branch, ang mga serbisyo sa main branch sa LandBank sa probinsiya sagol sa pisikal ug gisadya nga mga serbisyo ug sa teknolohiya sa digital, aron sa mas paspas ug mas gipasayon nga mga transaksiyon.
Apil niini ang serbisyong pinansiyal alang sa tanan, suporta sa agrikultura, ug pagpalig-on sa mga local nga mga panggamhanan. Padayon nga nakabenepisyo sa mga programa niini ang mga mag-uuma, mangingisda, ug gagmayng negosyante.
Dugang ni Charlotte Conde, Executive Vice President on National Development Lending Sector, nga serbisyohan sa Center ang mga probinsiya sa Davao del Norte, Davao de Oro ug Davao Oriental.
“We are accessible to the client. And this new corporate center will continue to serve our customers – the depositors of LANDBANK. Across Davao del Norte for the deposit services and then for the lending operations we are covering three provinces – Davao del Norte, Davao de Oro and Davao Oriental.
Mapasalamaton si Governor Edwin “Kuya Gob” Jubahib sa nindot nga pasilidad nga nagapakita sa dakong pagsalig sa LandBank sa lig-on nga ekonomiya sa probinsiya.
The new Davao del Norte Corporate Center stands as a monument of the Bank’s strong commitment to the transformation of DavNor’s economy,” sulti niya.
Gibutyag sab sa gobernador ang pag-aproba sa LandBank sa loan sa probinsiyal nga panggamhanan nga mokabat ngadto sa P2.5 billion.
Gigahin ang pondo alang sa pagtukod sa Convention Center with Dormitory atubangan sa NCCC ug tapad sa ginatiwas sa SM mall sa Tagum City; pagpatindog sa Recreation Center sa Island Garden City of Samal; ug, pagtukod sa Davao del Norte Stadium with Commercial Spaces nga kayang mopahiluna sa 8,000 ka tawo.
