Gipasidunggan ni Governor Edwin I.Jubahib ang 211 ka empleyado sa kapitolyo tungod sa ilang suporta, maayong serbisyo ug talagsaong kontribusyon sa pagpalambo sa probinsya. Ang pasidungog gitunol atol sa Gantimpala Agad Awarding nga gipahigayon sa Pavillon, Provincial Capitol, Mankilam, Tagum City niadtong Marso 3.
Gidawat nila ang mga sertipiko ug pahalipay sa mga awardees isip pasalamat kanila sa gobernador. Giila ni Gob.Jubahib ang ilang padayon nga suporta, katakos, ug dedikasyon sa paghatag og episyenteng serbisyo publiko.
Lakip sa mga gipasidunggan ang mga empleyado gikan sa Provincial Planning and Development Office (PPDO), Provincial Health Office (PHO), Provincial Social Welfare and Development Office (PSWDO), Provincial Environment and Natural Resources Office (PENRO), Provincial Information Communication Knowledge and Management Office (PICKMO), ug uban pang departamento. Giila usab isip garbo sa probinsya ang pipila ka mga kawani nga nakapasar sa Civil Service Examinations.
Gipasidunggan sab ang security guard nga Rico James Sanorjo nga nadestino
sa Carmen Zone District Hospital, tungod sa iyang pagkamatinud-anon ug integridad sa pagpanarbaho.
Ang pipila sa mga awardees aktibong mitabang sa pagpatuman sa Department of Agriculture Mindanao Inclusive Agriculture Development Project (DA-MIADP) ubos sa Local Management and Implementation Unit (LMIU), lakip ang Proposed Rehabilitation sa Barangay Gupitan ngadto sa Mangkat-Kapatagan Farm-to-Market Road nga adunay bridge component. Dako usab ang papel sa Provincial Health Office sa pagpalig-on sa health and wellness programs sa probinsya sa Davao del Norte.
Gipangunahan ni Provincial Human Resource and Management Officer Edwin Palero ang maong kalihokan uban ang nagkadaiyang mga department heads. Sa iyang mensahe, nagdasig si Palero sa ubang kawani nga sundon ang maayong panig-ingnan sa mga awardees aron mapadayon ang kultura sa kahusayan sa serbisyo.
Pinaagi sa maong kalihukan, gipakita sa administrasyon sa probinsya ang padayon nga pag-ila ug paghatag bili sa mga trabahante.
